Khelo India Tribal Games : Mizoram hmeichhe hockey team-in final an lut
A vawi khat nana buatsaih Khelo India Tribal Games-ah Mizoram medal lak a pung zel dawn - Mizoram hmeichhe hockey team chuan nimin khan semifinal-ah 3-2 in Jharkhand an hneh a, final an lut.
Mizoram hmeichhe team tan hian Marina Lalramnghaki, Agnes Malsawmkimi leh Lalrindiki ten goal khat ṭheuh an khung a, qualifying round final-a an lo ngam loh tawh Jharkhand hnehin final an lut - a ropui thlawt.
Mizoram hian Khelo India Tribal Games hockey-a tel phak tur hian qualifier an khel phawt a, heta ṭang hian team pariat chu inelna hmachhawn turin an tling - group pahnihah, team pali ve ve awmin ṭhen hran an ni a, league round anga an khelh kual hnuah group pahniha a sang pahnihin semifinal an lut.
Mizoram hian an group-a an awmpui Bihar, Madhya Pradesh leh Chhattisgarh te hneh vekin, semifinal an lut a, qualifying round final-a an ngam loh tawh Jharkhand an hmachhawn.
Jharkhand hian Mizo hmeichhiate laka an score hmasak hnuah 2-1 in Mizoram hian hma an hruai let. Mahse, Jharkhand hian si phurh sut lehin, 2-2 a ni.
Hun a tawp ṭep tawh tihah Mizoram tan tawnhriat nei ṭha Lalrindiki chuan chakna goal a khung - an goal thumna Diki'n a khung hian second tlemtê bak hun a awm tawh lo a, a hunah tak Mizoramin goal an khung a, he goal luh theih nana an team movement chu mit titlai a tling bawk.
Mizoramin 3-2 a an lo ngam loh tawh Jharkhand an pet chhuak a, hockey vanga hming chher tak Odisha chu final-ah an hmachhawn dawn. Mahse, Mizoram manager Lalzawnchhungi chuan an huphurh loh thu Vanglaini a hrilh.
Durtlang coach Mazawni chuan, "Jharkhand zawk hi kan lo hneh loh tawh kha an ni a, mahse, tunah chuan kan hneh let ta. Odisha hi chu qualifier-ah pawh kan hneh hnu an ni a, kan huphurh hran lo. Anmahni zawk hian min huphurh ang," tiin Vanglaini a hrilh a, a hlauthawng lo hle.
Mizo hmeichhe team-te hi National Centres of Excellence (NCOE) hmun hrang hrang, Bhopal, Mumbai, Manipur, Kolkata, Bengaluru leh STC, Thenzawla hockey zirlaite an ni hlawm a, coach hi SYS coach Lalrochhuangi niin, manager Mazawni pawh SYS coach tho a ni.
Khelo India Tribal Games Women’s Hockey final hi April 1, Nilaini tlai dar 5:00-ah khelh tur niin, Mizoram leh Odisha ten a thiam ber nih an inchuh dawn - inkhel hi DD Sports-ah live-a en theih tura pekchhuah a ni ang.