Italy vs Bosnia - hma hun a chiang dawn e!

Europe aṭangin World Cup khel thei ram 16 an awm a, ram 12 a chiang tawh - hmun ruak pali chu zaninah chinfel a ni dawn a, dinhmun la chiang lo zingah vawi li world champion ni tawh Italy an awm.

Italy hian zanin dar 12:15-ah playoff final khel turin Bosnia and Herzegovina an lenchilh dawn a, coach Gennaro Gattuso-a'n semifinal-a Northern Ireland an hneh hnuah, "Hei chu a bul ṭanna chauh a ni a, tunah chuan Everest lawn kan la bak a ni," a ti.

Gattuso-a ṭawngkam aṭangin an tih mai mai lohzia a lang chiang a, khualmuala khel tur an nihna chuan a harsatna a belhchhah. Tun hnaiah Italy hian dem an hlawh a, playoff semifinal-a Wales leh Bosnia intum ṭuma Bosnia chak an lawm lai video chu a darh.

Azzuri hian Wales aiin Bosnia hmachhawn an châk zawk tihna a ni a, hei hi Edin Dzeko-te ram hian an la na hle. AS Roma leh Juventus midfielder hlui, inkhelh chawlhsan ta Miralem Pjanić chuan, "Ban pharin kan lo lawm e," tiin an ram tum châk Italy chungchang a sawi a, hneh an châk hle tih a lang.

Kum 1982-a Italy tana World Cup nomawi chawitu, goalkeeper Dino Zoff pawhin an ram team sawiselin, "Italy khan thil ṭul lo tak an ti a, an khingpui turte an tiphur lehzual mai mai a ni," a ti.

Hetihlai hian Inter Milan defender Federico Dimarco chuan, "Mi ṭhenkhatin mawi lo taka che angin min sawi a, mahse, chutiang zawng chuan kan ngai lo. World Cup hnuhnung pahnih kan khel tawh lo a ni," a ti a, an lawmna hrethiam turin mipui a ngen.

Bosnia captain Edin Dzeko pawh kum 40 mi ni tawh mah se, World Cup khelh ngei tumin a inbuatsaih a, an fimkhur tur thu a sawi thung. Dzeko chuan, "Italy laka rin kai zawk nih chu a harsa a, mahni khelmuala inkhel tur ni mah ila, rin hlawh zawk an la ni tho," a ti a, pressure lak kian a tum.

Dzeko hian ram tan match 147 khel tawhin goal 73 a khungsak a, mahse, kum 2014 World Cup an khel tih bak an ram team hi World Cup a la khelhpui ngai lo.

German second division club Schalke 04 tana khel Dzeko chuan, "World Cup kan khel phak a nih chuan a ropui ngawt ang. Ka tan chauh ni mai loin, kan player, la naupang tak takte tan hian a hlu dawn lutuk.

"Player theihna nei sang tak tak kan nei ṭeuh a, an career atan a hlu dawn. Beiseina sang tak nen World Cup kan thlir a ni," a ti a, a career tawp lamah World Cup khelh leh ngei a duh - chumi tur chuan zaninah chak a ngai e.