Zaninah India U23 inlan dawn

Under-23 Tri-Nation Championship 2026-ah zanin dar 7:00 hian India U23 chuan Tajikistan U23 an hmachhawn dawn a, Blue Colts tan champion nomawi chawi turin draw result ringawt pawh a tawk ang.

Golden Jubilee Stadium, Yupia, Arunachal Pradesh-a neih inelnaah hian India, Bhutan leh Tajikistan te an inlan a, an intum kual vek hnua point hmu sang ber chu champion tur an ni.

India hian Bhutan hi 5-0 in an sawp tawh a, Tajikistan hian Bhutan hi hneh ve tawh tho mah se, 1-0 chiahin an chak. Hei vang hian zaninah India nen an in draw a nih chuan, point hmuh zat inangah India hi goal difference hmangin an champion thei dawn a ni.

India U23 head coach Naushad Moosa-a'n player 24 squad-ah koin, Chennaiyin midfielder Lalrinliana Hnamte (Terina), Bengaluru midfielder Lalremtluanga Fanai, Mohammedan SC forward Lalthankima (Thathana) leh Mumbai City midfielder Zothanpuia te an tel.

Zothanpuia'n squad zawm vek mah se, a nu thihna avangin Mizoram lama a rawn haw a ṭul a, squad-a awm tlang Terina, Tluangtea leh Thathana ten Bhutan lakah bul an ṭan nghal vek.

Terina chu captain atan hman niin, an champion a nih chuan captain armband a hren hmasak berah nomawi a chawi nghal dawn tihna a ni. Terina bakah Tluangtea leh Thathana ten zaninah pawh inkhel bul an ṭan tura beisei a ni.