Qatar-ah Jeremy Lalrinnunga
Mizo rawlthar ritchawi chak Jeremy Lalrinnunga chu Qatar 6th International Cup 2019 hmachhawn turin India tan a feh chhuak. December 20, Zirtawpni hian 67kg huangah a chawi dawn a ni.
Inelna hi nakkuma neih tur Tokyo Olympic qualifier zinga mi a ni a, a pawimawh hle. Qatar bakah hian nakkumah IWF World Junior Weightlifting Championship leh Asian Senior Weightlifting Championships te a la hmachhawn zui leh bawk ang.
Olympic-ah hian world ranking-a a sang pakhatna aṭanga pariatna an tel thei dawn, heng bakah hian khawmualpui hrang hrang- Africa, Europe, Asia, America leh Oceania bakah a thlengtu leh Tripaitite Commission invitation aṭangin pakhat ṭheuh an tel thei dawn.
India hian weightlifting huangah Tokyo Olympic atan hmun ruak pahnih a nei dawn a, tun dinhmunah chuan Mizo rawlthar Jeremy-a hi a inlan theih beiseina a sang hle. Govt. Complex rawlthar Jeremy chher chhuaktu, SYS coach Malsawma Khiangte chuan, "Tun inelnaah hian a khel ṭha a nih chuan beisei a sang, nakkumah pawh hma a sawn zel ang," tiin Vanglaini a hrilh.
Jeremy-a hmabak
1 Qatar 6th International Cup Doha, Qatar 19-24 December, 2019
2 IWF World Junior Weightlifting Championship Cairo, Egypt 05-15 March 2020
3 Asian Senior Weightlifting Championships Kazakistan 06-15 April, 2020