Mizoram beiseina a tawp

Khelo India Tribal Games football-ah Mizoramin group stage an paltlang lo. Mizoram hian final round lut turin Manipur leh Tripura te hneh mah se inelna takah Arunachal Pradesh leh Goa hneh loin an tla nghal.

Ravi Shankar Stadium, Chattisgarh-a inelna neihah Mizoram hian March 28, Inrinni khan Arunachal Pradesh an hmachhawn a, 5- 1 in an chak lo. Nimin khan Mizoramin Goa an hmachhawn leh a, hnehna an chang a nih chuan knockout stage an lut dawn.

Mizoram hian Lalramhmunmawia hmangin minute 16-na lekah goal an khung a, first half tawp hmain Joshua Vanlalrinliana Ngente-in an lamah a tihluh avangin halftime-ah 1-1 a ni. Second half-ah Mizoram chak tumin theihtawp an chhuah a, mah se an nawr luatah goal an chhuah ta zawk.

Goa tan Jef Barreto-a'n minute 88-naah a khung a, Pratamesh Damodar Goankar-a'n injury time-ah goal hnih a khung belh. Mizoram an mualpho a, chutihrualin qualifying-a an player pakua zet an chhawr theih loh bakah training-na hun an neih ṭhat loh avangin medal an hlawh chhuak zo ta lo.