Pencak Silat-ah Mizoramin medal la

1st ASMITA Khelo India Women's Pencak Silat League 2025-26-ah Mizo nula Vanlalṭhapuii'n gold a la a, Rudy Lalhmingmuani'n silver a la bawk. Inelna hi Shillong, Meghalaya-ah neih a ni.

Durtlang Kawn Veng nula Vanlalṭhapuii hian 100 +kg-ah gold a la a, Lawngtlai Bazar veng nula Rudy hian below 85 kg-ah silver a la thung. Mizoram team hi coach PMS Dawngliana'n a hruai a, Zotlang Veng tlangval PMS-a chuan, "Pencak Silat hi Mizote khelh chi tak a ni," tiin a sawi.

Pencak Silat hi Southeast Asia (Indonesia, Malaysia, Brunei leh Thailand) aṭanga lo chhuak a ni a, Martial Arts chi khat a ni. Pencak hian chetzia mawi leh inven dan a kawk a, silat hian insual tak takna leh inbeina lam a kawk thung. He infiamna hian hma a sawn chho mek a, Goa-a neih 37th National Games 2023-ah khan a vawi khat nan telh a ni.