Kum 1994 hnua WC khelh beisei Bolivia

Inter Confederation Playoff final-ah Bolivia-in April 1, Nilaini zing dar 8:30 hian Iraq an hmachhawn dawn a, hnehna an chang a nih chuan kum 1994 hnuah World Cup khel turin an tling ang. Kum 1994 khan United States-ah World Cup khelh a ni a, kumin inelna thlengtu zingah US an tel - Bolivia tan hun ṭhaah a ngaih theih.

Bolivia hian playoff final lut turin Suriname 2-1 in an hneh a, goal chhuah hmasa mah se Moisés Paniagua leh Miguel Terceros te hmangin an lehthal. Suriname an hnehna hmun kumin World Cup khelhna tur Estadio BBVA, Guadalupe-ah bawk final an khel dawn a, Iraq aiin tawnhriat an nei ṭha ang.

An khingpui tur Iraq-in FIFA ranking ṭhat zarah final an lut ngal a, World Cup an khelh hnuhnun ber erawh kum 1986 daih a ni tawh. Hemi ṭum hian Diego Maradona hoin Argentina an champion a, inkhelhna hmun hi Mexico niin tun ṭuma playoff khelhna a nih bakah World Cup khelhna tur a ni bawk.

Iraq hian international match an khelh hnuhnun ber chu nikum December daih tawh kha a ni a, FIFA Arab Cup quarterfinal-ah Jordan an hneh lo. US leh Israel ṭangkawpin Iran Iran an do avangin middle east-ah thlawhtheihna kawng an khar a, hei vang hian private thlawhtheihna hmangin Mexico hi an pan a, World Cup khelh ngei an tum ang.