Friendly-ah France an che ṭha

International break hman mekah France an che ṭha a, Les Bleus hian Pathianni zan khan 3-1 in Colombia an hneh. France tan Desire Doue-a'n goal hnih thunin, Marcus Thuram-a'n goal khat a thawh ve bawk. Colombia tan Jaminton Campaz-a goal khung chu scoreline timawitu chauh a ni.

Inkhel ṭan aṭangin team pahnihte an hmuhnawm a, Colombia tan Richard Rios-a'n a pet goal nghal teuh hle a, a ball pet na tak chu goal zawnah a kal lo hlauh. Colombia an hlauhawm chhunzawm a, France tlarhnung rum ṭhaih zeuh zeuh mah se keeper Brice Samba tan hna hautak an siam thei lo.

France erawhin an chance neih an chhawr ṭangkai nghal a, minute 30-naah Paris Saint Germain winger Desire Doue ball pet chu Colombia defender Daniel Munoz-a'n a lo dang pial a, goal-ah lutin France-in hma an hruai. Colombia keeper Alvaro Montero tan dan ngaihna a awm lo.

Goal an khung hnuah France inkhel a nung sawt a, minute 41-naah Maghnes Akliouche-a ball cross chu Thuram-a'n ṭha zetin a tauh lut a, an hmahruaina a belhchhah. Goal dang lut zuin loin chawlhlawk an hmang.

Second half-ah pawh France bawk an hlauhawm a, minute 56-naah Thuram-a cross chu vengtu nei lo Doue-a'n a goal hnihna atan a pet goal leh a, goal thumin hma an hruai.

Colombia an vanduai reng bik lo a, minute 77-naah Crystal Palace defender Jefferson Lerma ball pek chu Jaminton Campaz-a'n kawh takin a pet nghal a, post per mah se goal-ah a lut zui a, an si phurh a sut ṭhen.

Team pahnihten chance nei chhunzawm mah se goal an khung belh thei tawh lo a, hun tawp zui nghal a, harsatna nei loin France an chak.

Les Bleus hian international break-a an match pahnihah an chak ve ve a, March 26 Ningani zan khan 2-1 in Brazil an hneh tawh bawk. France squad a chhah a, an player rinrawlte an hahdamtir chungin Colombia lakah harsatna an tawk lo a, World Cup-ah pawh champion tura rinkai an ni leh dawn.

Tun international break hi friendly ni mah se World Cup hmaa inbuatsaihna hnuhnung ber a ni tawh a, France-in friendly match an khelh ṭhat avangin World Cup-ah an inringtawk sawt ang.