Fifth division club enkawl tur Defoe

Tottenham Hotspur striker hlui Jermain Defoe chu National League club, Woking FC chuan enkawl turin an lalut a, Defoe hian a career-ah a ngheta club a enkawl vawi khatna tur a ni.

Woking FC hian tun thla tir lam khan an head coach Neal Ardley an ban a, Craig Ross-a'n a enkawl lailawk a. Ross hian match riat a kaihhruai chhungin vawi li a chakpui a, vawi thum in draw-in vawi khat an chak lo.

Fifth division league table-ah Woking hi 11-naah an awm mek a, Defoe hoin tun season an khelh hmabakah a sang thei ang ber thlen an beisei dawn. Kum 43 mi Defoe hi 2021 khan Scottish club lian, Rangers tan coaching staff lailawk zingah a lo awm zeuh tawh a, hemi hnu hian Spurs academy a enkawl.

Spurs academy-ah kum hnih a awm hnuin UEFA A licence a nei a, Woking hi a enkawl hmasak ber tur a ni. Woking FC chairman Todd Johnson chuan, "Defoe hi player a nih lai aṭang tawha ropui a ni a, chu chu a hlawhtlinna chan ho hian a tichiang. Game thlir dan a thiam a, hruaitu ṭha a nih bakah player enkawl thiam tak a nih avangin kan ṭhatpui ngei ka beisei," a ti.

Defoe hi a thlak tur Ross bakah Fulham manager hlui Paul Bracewell leh Jake Hyde te nen an thawk ho dawn a, anni bakah hian club coaching staff awm sa ten an pui bawk ang.