Bucks playoff beiseina a thamral

NBA regular season khelh mekah Milwaukee Bucks an che fuh hleithei lo a, Pathianni khan Bucks hian 127-113 in Los Angeles Clippers an hneh lo a, playoff khelh an beiseina a tawp a, kum 10 hnua a vawi khat nan playoff-ah an inhlangkai pha lo.

Fiserv Forum, Milwaukee-ah inkhel ṭan aṭangin team pahnihte an nung nghal a, an inhnehtawk viau. Mahse second quarter tawp lam aṭangin Buck an zuai deuh a, Clippers-in an hmahruaina an tizau zel thung a, an hawi kir tawh lo.

Clippers tan player paruk ngawtin point 10 an score tling a, Bennedict Mathurin-a'n point 28 neiin a score hnem ber a, John Collins (22), Kawhi Leonard (20), Derrick Jones Jr (13) leh Kris Dunn (10) te an khel ṭha. Anni bakah hian Darius Garland-a'n point 15 neiin assist 11 neiin double double a siam a, James Harden nena an inthleng Garland a khel ṭha ṭhin hle.

Bucks tan Gary Trent Jr. (36), Taurean Prince (18), Aj Green (15), Cormac Ryan leh Andre Jackson Jr (13) te an khel chhia tia sawi tur an ni bik lo a, mahse Bucks squad a chhah lo. Player pariat chiah an inlan bakah an vanduai zan an tawng a, a tlawm zawkah an ṭang.

Milwaukee Bucks hi an match hnuhnung 10-ah vawi riat an chak lo a, an thiampuipa Giannis Antetokounmpo-a'n a khup vei lamah hliam a tuar a, Clippers lakah a inlan loin a zawna a vawi sarih nan a inkhel lo. Tun season-a beisei pha lo Buck hi Antetokounmpo tel loin an buai lehzual.

Antetokounmpo bakah a unaupa Thanasis, Kevin Porter Jr, Bobby Portis, Kyle Kuzma, Ryan Rollins, Myles Turner leh Gary Harris te hliam vangin an chan bawk. Bucks hian an dinhmun pawm thiam bak tih theih an nei rih lo.

LA Clippers erawh a zawnin match nga an chakna chiah a ni a, Western Conference table-ah pariatnaah an awm mek. Match sarih khelh tur la neiin, playoff khel turin la tling chiang lo mah se an khelh phak ngei a rinawm.