United chil tiputtu Magpies midfielder pahnih

Manchester United chuan Newcastle United midfielder pahnih Sandro Tonali leh Bruno Guimaraes te an duh a, nipui transfer bazar inhawn hunah an ngaihven dawn nia sawi a tam hle.

Michael Carrick-a hnuaiah Man United-in hma an sawn a, an chesual a nih loh chuan palina chinah season an khar a rinawm tawh. Season tharah Champions League an khel a nih chuan an sum hmuh a tam dawn a, bazar-na tur an ngah sawt dawn a, Newcastle midfield pahnihte hi lakluh an tum dawn.

United hi an midfielder tawnhriat ngah Casemiro-a'n season tawpah a chhuahsan dawn tih a tichiang tawh a, Brazilian midfielder thlakna tur an melh. Bruno Fernandes hnungah Kobbie Mainoo nena inkawp turin Newcastle duo hian an mit a la a, tu emaw zawk zawk lakluh an tum ang.

Tun season-ah Magpies an che ṭha tawk lo a, table-ah 12-naah awm mekin, Champions League an khelh phak a rinawm tawh lo a, Europa League khel turin an beisei a la bo lo thung.

Magpies-in UCL an khelh phak loh a, a khel pha club aṭangin sum tam tham tak nen an midfielder te hi an dawr a nih chuan an chelh rei theih a rinawm loh. Hetihlai hian Italian midfielder Tonali chuan a chhuak dawn a nih chuan Italy lamah let a duh nia sawi a awm bawk.