Verstappen a lungawi thei lo

Red Bull driver Max Verstappen chu FIA-in rules thar a duanah a lungawi thei lo a, F1-a a hma hun a chiang lo niin Pathiannia Japanese Grand Prix-ah an tlan zawhah a sawi.

Kum 28 mi Verstappen chuan,"Kan intlansiaknaah pasarihna emaw pariatnaah pawh thleng ila ka pawm thei. A chhan chu pakhatna emaw, pahnihna emaw podium thlen reng a theih loh tih ka hria.

Mahse, pasarihna emaw pariatnaa vela awm a, hlim loh hi racing driver tan chuan thil pangngai a ni lo. Tih tak zetin insiamrem ka tum a, mahse intlansiak hi nuam ka ti thei lo a ni.

Pawisa tam tak hlawhna chu a ni ngei mai, mahse a tawpah chuan sum ringawt hi a pawimawh ber lo a, nuam ti taka kan tlan hi a pawimawh zawk a ni. Verstappen hian 2021-24 khan a zawnin kum li chhung title a lo la tawh a, nikum khan point hnih lekin Lando Norris a hneh lo. 2026-ah erawh bul a ṭan ṭha tawk lo.

F1-in bung thar a kai a, F1 hi FIA-in a lo tih ṭhin danin car regualtions a thlak thar kum a ni a, tun thlasik khan thil lian tham tak an thlak nual a. 2026-a hman ṭan turin car bakah engine leh a ke thlengin an thlak vek. Thil thar an duan Australian Grand Prix, Albert Park Circuit, Melbourne-a neihah khan an hmang ṭan.

Rules thar a chhuah aṭangin sawiseltu zingah Verstappen a langsar a, Dutch driver hian engine tharin mamawh an ngah ta lutuk chu a lo sawisel tawh. Verstappen bakah Lando Norris pawhin Australian GP chu an intlansiak tawha nuam lo a tih ber ṭum niin a lo sawi tawh bawk.

Verstappen chuan,"Phunchiar pawh min ti mai thei, mahse car thar hi kei chuan khalh nuam ka ti thei lo a ni. F1 hi chhuahsan ka duh lo a, hma an sawn zel ka duh zawk. F1 hruaitute nen kan inbe tawh a, engkima hma kan sawn theih nan thil kan sawi ho," tiin Australian GP an tlan zawhah a sawi.