Liverpool-in Suarez an ngaihven

Premier League club Liverpool chuan forawrd thar an melh a, Sporting Lisbon forward Luis Suarez an ngaihven mek niin khawthlang chanchinbuten an tarlang.

Reds mit fukna Suarez hi an club-a lo khel tawh Uruguayan forward Luis Suarez kha a ni lo a, Colombian niin tunah Sporting tan a khel mek.

Suarez hian Almeria aṭangin Sporting hi a pan a, tun season-ah a che ṭha hle. Inelna hrang hrangah vawi 42 khel tawhin goal 33 a khung tawh a, Portuguese club hian a man an chhiar tlawm dawn lo.

Liverpool hian tun season ṭan dawnah man to takin Hugo Ekitike leh Alexander Isak te an la lut a, forward pahnihte hi che chhia tia sawi tur ni lo mah se Reds an che ṭhatpui lo a, season thara Champions League khel lo thei dinhmunah an ding mek. Season tharah Suarez hmanga tlarhma tih hriam an tum niin a lang.

Tun season-ah Liverpool-in beisei an pha lo a, Krismas laia an hnuaia awm an hmelma Manchester United-in an lehpel tawh a, result ṭha nei leh ṭhin mah se Reds an tlo lo a, anmahni ṭantute pawhin an coach Arne Slot an duh khawp tawh lo a, ban mai duhtu an tam tawh.

Hetihlai hian Liverpool hmatawng zinga ṭha bera chhal ngam, Mohamed Salah-a'n season tawpah a chhuah tur thu a tichiang tawh a, a thlakna tur an en nghal angah a ngaih theih bawk. Egyptian King hminglem an pek Mo Salah hi tun season-ah an coach Slot nen an inhmuthiam lo a, season hmasa nena khaikhinin bench-ah a ṭhu hnem hle.

Mahse Salah hian a thiam a la theihnghilh lo tih a lantir a, inelna hrang hrangah goal 13 a khung tawh a. Salah hi match 40-ah a inlan tawh bawk a, mahse a tam zawkah substitute bench aṭangin a lut.

League champion lai hian Suarez an la thei a nih chuan an tlarhma player-te khelhna hmun an sawn a ngai dawn a, France tan Ekitike hi left wing-ah an chhawr ṭhin avangin Liverpool tan pawh a khelh a ngai mai thei. Mahse Suarez an lak loh emaw, coach thar an nei a nih chuan thil a danglam thei.

Arne Slot-a team bakah Newcastle United hming a ri bawk a, Newcastle hian Suarez hi an duh ve nia sawi a awm. Magpies pawh hian Reds ang thoin Nick Woltemade leh Yoane Wissa te an neih bakah, Suarez mana an chhiar nia sawi pound maktaduai 80 chu an tlin a rinawm loh a, Colombian forward hi an la dawn a nih chuan an inhralh ṭhen phawt a rinawm.