Fulham an vannei - Mourinho

Nilaini zan khan Tottenham Hotspur-in Fulham an mikhual a, 1-1 in an inhnehtawk. Inkhelh banah Spurs boss Jose Mourinho chuan an khingpui Cottagers vanneih thu a sawi.

Tottenham Hotspur Stadium-a inkhelah Harry Kane tauh luh hmangin minute 25-naah mualneituin hma an hruai a, Fulham-in minute 74-naah Ivan Cavaleiro tauh luh hmangin an sut. 

Spurs hi Premier League hmahruaitu ni ve zawk mah se tun hnaiah point an hloh nasat avangin pakhatna Manchester United chu khelh zat inangah point rukin an pha lo. Mourinho hote tan Premier League nomawi chawi a harsa dawn a, amaherawhchu League Cup final an thlen tawh avangin nomawi nen season khar thei dinhmunah an ding.

Tottenham inkhel a nih tawh chuan Son Heung-min leh Harry Kane te an langsar ṭhin a, Nilaini zanah pawh Spurs duo te tal na mah se Fulham keeper Alphonse Areola a langsar ta zawk.

Kum 27 mi, Paris Saint-Germain aṭanga loan-a Fulham pantu Areola hian Son-a goal khung tur a kein ṭha takin a dansak a, South Korean forward ball tauh ṭha zet chu mak takin a dang hman bawk. Minute 25-naa Sergio Reguilon cross ball nalh zet Kane-a tauh goal erawh dan rual a ni lo.

Areola-a'n Son-a goal khung tur ṭum hnih ṭha taka a dan zarah Fulham-in point hmuh beiseina an neih phah a, an vannei tel ve bawk. Kane-a'n first half tawp dawnah hnai tak aṭangin goal zawnah a tauh thei lo a, second half-ah Son-a'n goal ban a pet per bawk.

Relegation zone-a awm tan point khat a hlu. Fulham tan point khat hlawh chhuak turin goal venhim ringawt a tawk tawh lo a, goal khung tel a ngai. Minute 74-naah substitute Ademola Lookman cross chu Cavaleiro-a'n a tauh lut a, a kawh ṭhat em avangin Spurs keeper Hugo Lloris tan dan rual a ni lo. 

Hun tawp lamah Spurs-in an nawr na a, Reguilon-a'n chakna goal khungah inngai hman mah se offside vangin pawm a ni lo. Fulham-in point khat hlu tak an hlawh chhuak a, Spurs erawh an chak zawh loh avangin pathumnaa awm theihna hun ṭha an bawhpelh.

Tottenham manager Jose Mourinho chuan, "First half-ah khan Alphonse Areola-a'n mak tak takin a dang a, second half-ah pawh a dang ṭha tho. Chak turin goal kan khung belh tur a ni a, chutihrualin goal chhuah tur a ni lo. Kan defender-ten an ven uluk loh avangin goal kan chhuah a ni," tiin hun ṭha an bawhpelh thu a sawi.

Fulham chungchang sawi zuiin Mourinho chuan, "Fulham khan an khelh dan tur an hre chiang a, point hlawh chhuak tura goal venhim ṭulzia pawh an hria. Chutihrualin an vannei tel a, an khel ṭha tih erawh zep rual a ni lo," a ti.

Fulham boss Scott Parker chuan, "Kan dinhmun thlir chuan kan khel ṭha hle. Player ṭhenkhat zingah khan ni khat chauh training nei te an awm a, an inpekna a nasa hle. Kar hnih chhunga kan hun tawn thlirin kan result hi a lawmawm hle a ni," tiin a sawi. December thla tawp khan Covid-19 vangin Cottagers an buai a, an inkhelh hun thlenga sawn a ngaih phah.