Palace leh Brighton inhnehtawk

Thawhṭanni zan khan Premier League inkhel pakhat a awm a, mualneitu Crystal Palace chuan goal an phurh reng hnuah Wilfried Zaha hmanga sutin an mikhual Brighton & Hove Albion nen 1-1 in an inhnehtawk. Selhurst Park-a inkhelah hun chanve hma lamin goal a lut lo a, second half minute 54-naah Neal Maupay chuan box chhung aṭangin chiang zetin goal hmahruai a khung.

Palace lamin hun ṭha insiam zauh zauh mah se a chhan letna tur an nei thei mai lo. Amaherawhchu, nipui bazar laia club lian dangin an rim Zaha chuan minute 76-naah hnai tak aṭangin siphurh sutna goal a khung, goal dang lut tawh loin point an insem a ni.

Khualmualah Brighton lamin inkhel an thunun zawk a, ball an chan tam bakah hun ṭha an nei nual. Aaron Mooy-a'n box pawn aṭanga kum mawi taka a pet chu goal pawn chiahah a kal - Yves Bissouma leh Pascal Gross te khung tur pawh dansak an ni bawk.

Martin Montoya chuan penalty a hlawh ngei niah a inngai, mahse video assistant referee (VAR) hman a nih hnuah pek a ni lo. Davy Propper, Maupay, Bissouma, Trossard leh Montoya te pet pawh Palace keeper Vicente Guaita chuan a dansak vek.

Brighton manager Graham Potter chuan, "A tir lam minute nga chhung kan talbuai deuh a ni mai a, a bak zawng chu inkhel kan thunun viau. A pawimawh tak mai goal kan nei hnem thei lo a, goal hnihna kan khung thei lo kha a tawpah chuan kan tuar ta a ni.

"Premier League-ah chuan goal khat chauh kan khung a nih chuan point thum hmuh nan a him tawk lo deuh ṭhin. Chutihrualin Palace kha team ṭha an ni a, point hmuh ngei tumin theihtawp an chhuah tih pawh kan hriatpui ve bawk. A khaikhawm nan chuan khelh ṭhat nia point hmu turin hmasawn kan mamawh," a ti.

Premier League season kal laiah table mawngphaha awm Watford chuan an khingpui lamah vawi kua chiah an la chhuih lut a, anni dawta goal khung tlem chu Crystal Palace (15 goals) hi an ni. A sang zual 10 zingah tel phak mah se an tlarhma a bil viau tih a lang.

Ivory Coast international Zaha, Jordan Ayew leh Christian Benteke te hi player ṭha pangngai tak an ni, an khelh fuh ni chuan tlarhma hlauhawm tak ni thei an ni. Mahse, kuminah an khelh ho hnem nachungin an inman tawk lo deuh a, goal an khung hnem lo.

Crystal Palace manager Roy Hodgson chuan, "Goal phurh hnuah chuan team tam tak an talbuai ṭhin, keini erawhin sut ngei tumin theihtawpin kan bei let thung," tiin a naute a chhuan thu a sawi, tun hnai an match li chhung chu tlawm an nei lo - Arsenal chungah an inhlangkai chiah bawk.

Palace hian Inrinni zanah Premier League match an khel zui leh dawn a, Inrinni zanah Newcastle an tlawh ang. Brighton chuan anmahni mualah Sheffield United an lo mikhual thung dawn a ni.