Foden-a'n Man City chakpui

India ramin FIFA Under 17 World Cup an thlen ṭuma best player Phil Foden-a goal hmangin Manchester City-in Nilaini zan khan Brighton & Hove Albion 1-0 in an hneh.

Pep Guardiola hote hian match 14 chhung inelna hrang hrangah chak loh an nei tawh lo a, chutihrualin Premier League-a 17-na Brighton laka goal khat chauha an chak hian chesual ve thei reng an ni tih a lantir thung.

Brighton hmachhawn tur Manchester City squad-ah Sergio Aguero a la tel lo a, Gabriel Jesus hming lang tawh mah se inkhel bul ṭantu zingah forward tiha chhal theih an awm lo.

Captain armband hrengtu Kevin de Bruyne chu hmatawngah a awm a, Phil Foden leh Riyad Mahrez te ding leh veiah an awm. Tlarhma pathum thlawp turin Bernardo Silva leh Ilkay Gundogan te awmin Rodrigo chu tlarhma leh tlarhnung thlun zawmtu a ni.

Player inrem dan hmang aṭangin Pep Guardiola kut hnu a ni tih hai rual a ni lo a, Spanish manager hian hlawhtling takin Barcelona-ah a hmang tawh. De Bruyne khelhna position hi football ṭawngkam chuan 'false nine' tih a ni a. Belgian midfielder hian theihna a neih san avangin Jesus leh Aguero tan pawh match pawimawha bench-a ṭhut zui zel hi thil theih tak tur a ni.

Chutihrualin Brighton laka goal khat chauh an khung hi a sawisel duh tan chuan forward mumal awm loh vang a tih theih tho bawk. Man City hian 66% ball an chang a, goal attempt pawh vawi 16 zet nei mah se an hriam tawk lo a, goal zawna vawi ruk an pet chungin vawi khat chiah an khung.

Man City-in football mawina an pholang. Tlarhmaah Gundogan, Foden, Mahrez, Bernardo Silva leh De Bruyne te a intlan thelh kual a, minute 14-na lekah Belgian midfielder KDB-a'n ball pet chu keeper Robert Sánchez-a'n a dansak.

Brighton tlarhnung talbuai deuh ṭhin mah se an ṭang khawng ve tlat. KDB-a bawkin box chhung aṭangin indirect freekick a khung lo a, Mahrez pawhin chance ṭha a hlah.

First half tawp lama Foden leh KDB te inthlawp chu player theihna sang bik tan loh chuan tih mai mai theih a ni lo a, ball an thiam satliah lo - an tlan chak tel. Minute 44-naah English rawlthar duhawm Foden-a'n ṭha zetin a khung.

Second half-ah goal tam zawk beisei ni mah se Mahrez-a'n chance ṭha a hlah nawn a. Gundogan-a ball pet keeper Sanchez-a'n a dan hnuah Bernardo Silva-a'n crossbar a pet per. 

Defender Joao Cancelo leh De Bruyne te ball pet keeper Sanchez-a'n a dansak ve ve a, injury time-ah KDB-a penalty hlawhchhuah Raheem Sterling-a'n goal zawnah a pet thei lo. 

Nikum November 21 khan Man City hian Tottenham 2-0 in an hneh lo a, table-ah pawh 11-na an ni hman hial. Amaherawhchu squad nei ṭha danglamna a lang chho a, tunah chuan City hi an goal nawr chauh na loin tlarhnung pawh a phu tawh.

Manchester City manager Pep Guardiola chuan, "Brighton hi an rilru put hmang a dik a, khelh an harsa ṭhin. Chutihrualin kan tan chuan chak ngei a ṭul a, kan tan inzirna tur ṭha tak a ni. Tun ang inkhel harsa hi kan tawng chho zel ang," tiin inkhelh hmabak a harsat tur thu a sawi.

Foden fak zuiin Pep chuan, "Phil Foden hi kum 20 mi chauh a ni. Football player langsar dangte nen a khelh zat leh a assist neih zatte hi han khaikhin ila, a nep lo a ni. Tlarhmaah a chhawr theih vek a, ding leh veiah a awm theih bakah false nine angin a awm thei bawk. Goal hmaah a fing em em a, khelh hi a phu a ni," a ti.

Man City hian league-ah Crystal Palace, Aston Villa, West Brom, Sheffield United leh Burnley an tum chho dawn a, point 15-in a hmuak mek a tih theih. Pathianni zanah City chunga awm Liverpool leh Manchester United te an inkhel dawn a, Pep Guardiola hote hi an chesual a nih ngawt loh chuan hmahruaitu an ni hnai viauah a ngaih theih a ni.