Bayern Munich tlarhnung a buai

Tun dinhmunah Bayern Munich chuan tlarhnung laia khel ṭhin pangngai Jerome Boateng chiah an nei a, German defender pawh hi hliam dam hlim a ni - goal khung thei mah se an tlarhnung pawp hi Bayern buaina a ni mek.

Nipui bazar lai khan Bayern hian Lucas Hernandez leh Benjamin Pavard te an lalut a, France international pahnih hi mual sir lama khel ṭhin an ni. An neih sa David Alaba leh Joshua Kimmich te chu an khelhna siksawisak fo an ni a, khelhna hmun nghet pangngai an nei rih meuh lo.

Germany international Kimmich hi chu midfielder atana chhawr theih bawk a ni a, Bayern chhulchhuak a nih bawk avangin atan Allianz Arena hi hmuh nuam a nihna a bo chuang lo a, nakin lawka captain la ni tura ngaih a ni bawk.

Mahse, tun hnaiah kum 27 mi Alaba erawh a dinhmunah a lungawi tawk ta lo nia sawi a awm. Austria international chuan, "Defender ṭha tak tak kan nei a, hliam vangin tun dinhmunah kan indaih lo deuh mai zawk a ni.

"Khelh duhna leh thiam bikna chu kan nei ngei mai, chutihrualin a pawimawh ber erawh club tana ṭha ber tura khelh kha a ni. Ka khelhna hmun hi a lai a ni emaw, a sir pawh nise lawm lohna ka nei hran lo. Keichuan theihtawp chhuahin ka bei zel ang," tiin a sawi.

Niko Kovac bantu Bayern hi kumin chhung chu manager lailawk Hans-Dieter Flick-a'n a enkawl dawn. German champion hian zanin dar 1:00 hian league match khel turin Freiburg an lenchilh ang.