El Clasico - a hun a thleng leh ta

"Spain ram pum a reh duk ṭhin," tiin El Clasico ropuizia sawi a ni ṭhin a, chutiang taka game ropui chu zanin dar 12:30 hian Barcelona leh Real Madrid ten an khel dawn. 

Spanish football chanchin ziahna lehkhabu ropui 'Morbo: The Story of Spanish Football' tih ziaktu Phil Ball chuan, "Pawnlam mite tana hriatthiam phak loh khawpin an inhuatna hi a sosang a ni," tiin a sawi.  Chutiang khawpa team inhal pahnih chu Nou Camp-ah an intawng dawn a, boruak 'hot' sa piahlamah La Liga hmahruaitu zawnna a ni nghal dawn. Hriat tel tur chu zanin inkhel tur hi Catalonia buaina avanga El Clasico hun an sawn kha a ni a, La Liga inkhel dang a awm dawn lo. 

Club pahnih hi match 16 an khelh tawhah point 35 ve ve neiin an awm mek a, zanin inkhela chak zawk hian La Liga nomawi chawi tur thui takin a hril dawn tihna a ni nghal. 

Tun season-a thil mak angreng tak chu Barcelona, Real Madrid leh Atletico Madrid ten beisei an phak lo vek hi a ni a, hetichung hian club pathum hi a inel ber erawh an ni reng tho. Real Madrid-in season hmasaah bul an ṭan fuh lo a, coach ringawt pawh vawi thum an thlak hman - a tawpah Zinedine Zidane an lalut a, beiseina nen tun season an ṭan. 

Mahse, French coach hnuaiah meuh pawh Real-in eng ruai an ang chuang lo a, an vanneihna erawh Barcelona-in beisei an lo phak lo ve ringawt hi a ni! Catalan club hi league match 16 an khelh tawhah vawi thum an tlawm tawh!

Beisei phak lo team pahnih tan hmelma kumhlun club hneh hi insawi harhna remchang a ni dawn a, club pahnihin point thum ve ve hlawhchhuah an tum ang. 

La Liga-a an match hnuhnung berah Barcelona-in Real Sociedad an inhnehtawkpui hram a, Real-in El Clasico hmaa an hmelma kumhlun tlanpel theihna remchang an nei. 

Mahse, Valencia khelmualah Real-in eng ruai an ang bik lo a, hun pek belha Karim Benzema goal khung hmangin Valencia an draw hram - mahse he result hi zanin inkhel tur ti 'hot' lehzualtu a ni miau si. Benzema hi tun season-a Real player 'hot' ber tia sawi ngam a ni a, inelna hrang hranga match 21-a khelh tawhah goal 16 a khung a, a pawi ber erawh thlawptu ṭha a nei lo hi a ni. 

Benzema tih loha Real squad-a goal khung hnem ber chu defender Sergio Ramos a ni a, Madrid captain hian match 20-ah goal nga a khung - hei hian tun hnaia Real dinhmun chiang takin a hrilhfiah. 

'Cristiano Ronaldo thlaktu' tih meuhin Eden Hazard chungchang sawi a ni a, mahse tun dinhmunah chuan Chelsea forward hlui hian Ronaldo pheikhawk hnutchhiah a la inthawlh tawk lo hle. Hazard hian tun season-a match 13-a khelh tawhah goal khat chiah a la khung a, a keah hliam a neih avangin zaninah a inlan thei dawn lo bawk - a record enin 'channa' tia sawi ngam a harsa. 

Real vanduaina chu nipui transfer-a an lakluh ten goal an keng tel lo hi a ni a, euro maktaduai 60 man Luka Jovic pawh hi Madrid khawpuiah Hazard ang thoin a la tlangnel thei lo - match 13-ah goal khat chiah a la khung! Marcelo, James Rodriguez, Marco Asensio leh Lucas Vazquez te chu hliam vanga inlan thei lo tur vek an ni a, hremna a tawrh zawh hnuah Ferland Mendy a inlan thei dawn thung a, Gareth Bale a dam leh tawh bawk. 

Barcelona-in Lionel Messi an la neih reng avangin goal khung lamah harsatna an nei lo a, tun season-a match 16-a khelhah goal 14 a khung leh der tawh - Real lakah goal khung chakin a tuihal ang. Luis Suarez a la rintlak reng a, Uruguayan striker hian match 19-ah goal 12 a khung tawh. Barca zawm tirhah Antoine Griezmann-a'n beisei phak lo mah se tun hnaiah ngai a awh chho ṭan a, match 21-ah goal sarih a khung tawh. 

Barca tan Ousmane Dembele leh Arthur te la inhliam mah se buaina tur niin a lang lo a, coach Ernesto Valverde-a'n duhthlan tur player a nei. Hriat tel tur chu tun hnaia Catalan club result a chhiat apiangin Spanish media lamin Valverde lam an hawi ṭhin a, zaninah an chak lo a nih ngat chuan 'Valverde ban' chungchangin ring takin a zui leh ang a, a thlen ngei chance pawh a sang hle ang.