Barca chhuahsan chunga hlawh nei tur Messi
Nipui transfer-a a contract hmang zo mai tur Lionel Messi-a'n Nou Camp-a chhuahsan ngei ringtu an tam zel a, hetiang boruak karah hian Barca fan-te tan thu hriat nuam lo hriat tur a awm leh ta.
Khawvela footballer ṭha ber ten an dawn ṭhin Ballon d'Or chawimawina vawi ruk dawng thei Messi hian nipui-ah Barca hi a chhuahsan a nih pawhin kartin £170,000 chu kum 2025 thleng Barca aṭang hian a la hlawh thei dawn!
Spanish chanchinbu lar Marca-in an tarlan dan chuan Messi hian a contract hman zawh rualin Catalan club aṭangin pound maktaduai 34.7 bonus dawn tur a ni.
Manchester City leh Paris Saint-Germain nena sawizawm forward hian kum 2017 khan Barca-ah hian kum 2021 thleng khel turin contract-a ziak a, hetihlaia a contract-ah hian bonus, pound maktaduai 69.7-a dawn tur thu a inziak tel.
Pound maktaduai 34.7 hi contract zawh ruala dawn tur a ni a, a bak zawng hi Catalan club hian instalment-a an pek tur a ni a, kum 2025 ral hmain vawi riat pekah an pe tla tur a ni, tia ziak a ni.
Messi pawisa dawn tur zat hi kartina a hlawh tur anga chhutin £170,000 a la tling a, hei hi world class player tam takin an hlawh phak loh a ni - player chhuak hnena pek atan chuan a uiawm khawp ang.
Barcelona hi sum lamah an talbuai mek bawk. Spanish media-ten an tarlan dan chuan pound tluklehdingawn khat dawn Catalan club hian an ba mek a, heng zinga pound maktaduai 400 dawn chu tun hnai thla 12 chhunga rulh zawh tur a ni bawk.
La Liga club hian 2019-20 season khan football club zinga kum khata pound tluklehdingawn khat hmu hmasa ber nih an inbeisei thu an sawi a, mahse, Covid-19 vangin an beisei angin thil a kal lo - pound maktaduai 73.5 an hloh zawk!
Barcelona hian season ṭan dawn khan tun season atan pound maktaduai 704 lakluh an inbeisei a, mahse, an sum hmuh inbeisei zat hi an hmu dawn lo tih a chiang tawh.
Catalan club ruahmannaah hian ticket hralhna a tel a, December-ah stadium-a 25% tal an kal theih an beisei - hei hi a thleng lo a, February-a stadium khata mipui awm tura an beisei phei chu a thleng dawn lo tih a hriat. January-ah Barca hian President thar an thlang dawn a, President thar tan hna a awlsam dawn lo tih a lang.