Club World Cup-ah Liverpool inlan dawn

Nizan League Cup quarterfinal-ah Liverpool chuan Aston Villa an hmachhawn a, he thu buatsaih a nih lai hian result kan hre hman lo. 

Zanin dar 11:00-ah Liverpool inkhel en tur a awm leh nghal dawn a, Club World Cup semifinal-ah Monterrey an hmachhawn dawn. Reds hian fixture hautak avangin League Cup lamah player naupang rual an inlantir a, zaninah erawh an player neih ṭhat ber nen Club World Cup an hmachhawn dawn thung. 

Liverpool boss Jurgen Klopp chuan, "Kan chet chhiat an nghak ṭhup a ni," tiin an fixture hautak chungchang a lo sawi tawh a, mahse hei erawh thlentir a duh lo ang. 

Liverpool hian Inrinni zan khan Watford chu 2-0 in league match-ah an hneh a, Pathianni zing khan CWC khelhna tur hmun Qatar an pan nghal. Klopp-a'n hun a ngah tawk lo a, Qatar pana thlawhtheihnaa an chuan laiin Monterrey-in 3-2 a Al Sadd an hnehna inkhel chu a en let!

Reds manager chuan, "Inkhel hmuhnawm tak a ni a, team pahnih inkhel a nung hle. Uluk takin an khelh dan ka zir a, ruahmanna pawh kan siam ṭha. "Central American team ka hmachhawn hmasak ber tur a ni a, hriatreng tlak a nih ka duh," tiin Mexican club hneh tura an inbuatsaih thu a sawi.  

CONCACAF Champions League champion Monterrey hian quarterfinal aṭangin CWC an khel ṭan a, an match hmasa berah 3-2 in Al Sadd an hneh nghal. Monterrey hi Reds tan zuam ngawt chi an ni dawn lo. Tottenham Hotspur striker hlui Vincent Janssen an nei a, Centre back nichunga tun season-a match 19-a khelha goal sarih khung thei Nicolás Sánchez te hi ngaihthah an harsa. 

Mexico tana vawi 44 inlan tawh Jesús Gallardo, Paraguay international Celso Ortiz leh tun season-a match 18-a khelha goal kua khung tawh Rogelio Funes Mori te hi ven uluk tur an ni dawn. A tawi zawnga sawi chuan Monterrey hi Liverpool ang thoa khawmualpui pakhat champion ni thei an ni a, awlsam taka dan tur chi an ni lo ang.