Spurs leh De Zerbi ten inbiakna nei

Tottenham Hotspur chuan Roberto de Zerbi coach thar atan an duh a, inbiakna an kalpui ṭan niin khawthlang chanchinbu ten an ziak. De Zerbi hi Spurs hian a rang thei ang bera an club enkawl turin an duh a, mahse chanchinbu ṭhenkhatin an inbe rem a nih pawhin season tawpah a enkawl chauh dawn niin an sawi bawk.

Kum 46 mi De Zerbi hi French club Marseille hotute nen an thu a inhmu lo a, February khan inhriatthiam tawnnain an inṭhen a, club enkawl dang a la nei leh lo. Tun hnaia talbuai Spurs-in an club enkawl turin an duh a, Italian coach hian Brighton & Hove Albion pawh a lo enkawl tawh avangin Premier League-ah a mikhual dawn lo a, Spurs-in anmahni khai chhuak turin an duh.

Spurs hi Premier League-ah 17-naah an awm mek a, relegation zone aṭangin point khat chauhin an him a, 2026-a league match an khelhah chak an la nei lo. Interim manager atan an lak Igor Tudor-a'n Pathianni khan a chhuahsan a, ni 44 chiah a enkawl hman.

Hetihlai hian Spurs enkawl thei zingah Sean Dyche hming a ri tel a, English manager hi tun season tawp thleng enkawl turin Spurs-in an sawm nia sawi a awm bawk. Mahse February thlaa Nottingham Forest-in an ban, Sean Dyche hian Igor Tudor a thlak dawn a nih chuan thla 18 daih contract a duh a, hei hian Tottenham duh tak Roberto de Zerbi an lak luh a tih harsat phah dawn avangin Dyche hian a enkawl a rinawm loh.

Tottenham lo enkawl tawh Ryan Mason, Harry Redknapp, leh Tim Sherwood te chuan tun season tawp thleng interim manager anga he hna hi lak an hreh lo hle a, chutih laiin tun huna an player ni mek Ben Davies pawh coach thar an neih hmaa enkawl tura sawi a awm bawk.