Rajasthan-in CSK an sawp

IPL match hmasa pahnihah team paliin run 200 an siam tlin vek laiin champion ngun ber Chennai Super Kings erawhin run 127 chauh an siam a, Rajasthan Royals-in wicket riatin an sawp. Royals tan kum 15 mi Vaibhav Sooryavanshi-a'n half century a siam.

Barsapara Stadium, Guwahati-a inkhelah Rajasthan-in vawm hmasak an thlang a, Chennai Super Kings-in kumin T20 World Cup-a India champion puitu Sanju Samson kawl mah se beisei angin bul an ṭan ṭha lo. Samson-a'n run ruk chauh a siam a, Jamie Overton-a'n run 43 siam mah se awmzia a awm pha lo.

Over 19.4-ah CSK-in run 127 siamin an thi fai vek a, Rajasthan bowler Jofra Archer (19/2), Nandre Burger (26/2) leh Ravindra Jadeja (18/2) te an ngam lo. Royals tan hna a harsa a awm lo a, kum 15 mi Vaibhav Sooryavanshi-a'n ball 17 lekah run 52 a siam a, Yashavi Jaiswal-a'n thi loa run 38 siamin over 12.1 lekah run 128/2 siamin hnehna an chang.