Gold hawn ngei kan duh - Mazawni

Khelo India Tribal Games Women’s Hockey final-ah vawiin tlai dar 5:00 hian Mizoram an inlan dawn a, hockey thiam vanga lar Odisha nen champion nih an inchuh dawn - a harsa ang.

Mahse, Mizoram manager Lalzawnchhungi chuan an phur tawh thu sawiin, "Kan player-te an fit tlang a, taksa mai ni lo, rilru lamah pawh final khel tur hian kan inpeih tawh hle.

"Chak ngei tumin theihtawp kan chhuah dawn a, Mizoram tana gold hawn ngei kan duh. A hlawhtlinna erawh Pathian thu a ni a, Mizo mipuite ṭawngṭaipuina kan ngen bawk a ni," tiin Vanglaini a hrilh.

Mazawni chuan, "Kan player zingah inhliam pahnih kan nei a, mahse, ngaihtuahawm erawh an ni lo. Final khel turin kan phur tawh hle," a ti a, zaninah Mizoram tan gold hlawhchhuah ngei an tum dawn.

Mizoram hian group stage-ah Bihar, Madhya Pradesh leh Chhattisgarh te hneh vekin, semifinal an lut a, qualifying round final-a an ngam loh tawh Jharkhand hnehin final an lut zui.

Final-a an hmachhawn tur Odisha hi qualifier-ah an lo hneh tawh a, Mizo hmeichhiate rilruin a ngam sa. Hetihrual hian 'game' a ni miau a, chetsual theih a nih avangin fimkhur a finthlak dawn.

Mizoram hi SYS coach pahnih Lalroṭhuami leh manager Lalzawnchhungi ten an kaihruai a, result an neih ṭhatpui hle - vawiin tlai final hi DD Sports-ah live-a en theih turin pekchhuah a ni ang.