Sum ngah ngah an hmelṭha lo deuh!

AIFF-in commercial partner tur a zawnna kawngah Genius Sports-in FanCode aiin an ngam huai fe a, mahse, ISL club-te chuan New York-a hmunpui nei Genius Sports aiin FanCode thawhpui an hnial lo zawk!

Genius Sports-in kum 20 chhung atana AIFF hnena sum pek an huam zat hi vaibelchhe 2,129 a nih laiin, FanCode ngamna vaibelchhe 1,190 erawh a let deuhthawin a tlem zawk - a tam zawk hi pawm mai awm tak niin a lang.

AIFF pawhin Genius Sports hi thawhpui an duh zawk a, Indian football thuneitu sang tan chuan a hahdamthlak zawk dawn tih a chiang. Mahse, ISL club-te chuan FanCode bid-na hi a fuh zawkin an hre ve tlat thung.

Tuna AIFF ruahmannaah chuan, commercial partner-in sum a pek aṭanga 20% chu AIFF hian a chang nghal ang. Season tawp rualin, ISL aṭanga lakluh, hlawkna 70% chu AIFF leh club ten an insem leh ang - 10% AIFF in a chang ang a, 60% chu club-te insem tur a ni.

AIFF hian Genius Sports a thawhpui chuan, ISL-in hlawkna siam lo pawh ni se, sum engemaw zat a hlawh dawn tho tho a, chuvang chuan an tan chuan Genius Sports thawhpui hi a ṭha zawk.

Hetihrual hian ISL club tan chuan FanCode-in kum khata vaibelchhe 36 vel pek an inhuam hi a fuh zawk - hlawkna a awm chance a sang a, ISL club tan sum dawn tur a tam sawt dawn tihna a ni.

Hei vang hian club-in FanCode thawhpui an duh zawk hi thil awm tak a ni ve. AIFF hian Genius Sports hi an thawhpui chuan, kum 20 chhungin vaibelchhe 425.50 vel chu an tel ngei dawn a, FanCode an thawhpui chuan vaibelchhe 238 an tel thung ang.