A tawp thlenga ṭang ngam Aizawl FC vanduai

Mizo Derby-ah Aizawl FC-in Chanmari FC hneh mah se R. Lalruatfela hote hi nimin khan Gokulam Kerala lakah 4-2 in an chak lo. Payyanad Stadium, Manjeri-ah inkhel hmuhnawm chhawp chhuah a ni a, first half-ah Gokulam tan Rahul Raju, Trijoy Dias leh Thabiso Brown ten goal khat ṭheuh an khung. Mizo club-in hun tawp dawn hnaihah Sawma Tlangte leh Zomuansanga hmangin siphurh an sut ṭhen a, hun tawp lam inkhel boruak a sang hle. Mahse, Mizo club-in an nawr luatah Raju-a'n Gokulam tan chak nemnghetna goal a khung.

Kerala club hian nimin inkhelah hian bul an ṭan ṭha a, minute hnihna lekah Rahul Raju-a'n Trijoy Dias-a siamsak chu a khun nghal. Minute hnih hnuah Raju hian Dias hi a siamsak ve leh a, minute nga pawh tling loah 2-0 a ni nghal der. Aizawl FC-in insiamṭhat tumin nawr ve mah se Laltlanzova (Zozoa), Vincent Lalduhawma leh Zomuanpuia te goal hmaah an hriam tawk lo a, goal an khung thei lo. Minute 33-naah Gokulam tana khel Mizo tlangval Moses Lalrinzuala'n ṭha zeta a lakluh hnuah a cross ball ṭha tak chu Thabiso Brown-a'n a tauh lut.

Mizo club-in siphurh sut turin second half pum an nei a, Chanmari FC laka tho chhuak thei R-a hote goal pawh a na. Minute 87-naah Sawma Tlangtein box pawn aṭangin ṭha zetin a pet lut a, minute hnih hnuah Khawbel tlangval Zomuana'n a tauh lut lehnghal. Aizawl FC-in na takin an nawr zui a, mah se goal an khung belh lo a, Kerala club zawkin counter attack hmang ṭangkaiin Raju hmangin an khung. Gokulam 4-2 in an chak a, Mizo club an huaisen thung.