A na thlawt a ni - Gattuso

Coach rorum Gennaro Gattuso-a'n World Cup-a Italy a hruai thlen loh chuan, an ram aṭanga hla takah a pem tur thu a sawi a, tunah chuan puanthuah tel a hmabak ta.

Gattuso chuan, "A na thlawt a ni. World Cup khelh kan mamawh a, Italy ram pumpui hian chu chu a mamawh a, hma kan sawn zel theih nana kan mamawh a ni. Mahse, kan khel dawn ta lo a, pawm thiam a harsa hle," a ti.

Vawi li ngawt world champion ni thei Italy hian kum 2006 khan World Cup nomawi an chawi a, mahse, kum 2010 leh 2014-ah te group stage-ah an tla a, kum 2018 leh 2022-ah World Cup an inpetkai zo lo bawk.

Gattuso chuan, "World Cup kan khelh phahna tur ni se, ka nun hun tam zawk leh sum zawng zawng pawh kan hlan phal ang," a ti a, mahse, a kaihhruaina hnuaiah ngei an khel phak miau si lo.

Italy tlawm mah se, Italian Football Federation (FIGC) Gabriele Gravina chuan Gattuso chu cham tura a sawm thu a sawi a, hemi chungchanga zawhna chu AC Milan midfielder hlui Gattuso chuan, "Ka hma hun a pawimawh rih lo," tiin a chhang!

Hetihlai hian an ngam loh tak Bosnia-Herzegovina tan erawh vawi hnih World Cup an khelhna tur chiah a ni a, kum 40 mi captain Edin Dzeko pawhin World Cup khel chung ngeia international football chawlhsanna chance a nei dawn.

Bosnia hi World Cup-ah group B-ah an awm dawn a, Canada, Qatar leh Switzerland te nen an awm ho dawn avangin a harsa dawn lo.