India-in chakin Asian Cup qualifier an thlah

AFC Asian Cup Saudi Arabia 2027 Qualifiers-a an match hnuhnung berah India an chak a, an mikhual Hong Kong chu 2-1 in an hneh - Blue Tigers-in hnehna hlado an chham ve ta.

India tan Ryan Williams chuan minute lina lekah goal hmahruai a khung a, Blue Tigers tana a match hmasa berah goal a khung nghal - minute 50-naah Akash Mishra chuan a belhchhah a, 2-0 a ni.

Hong Kong hian minute 65-naah Everton Camargo hmangin si phurh an sut ṭhen a, mahse, hun tawp thlenga goal dang a luh tawh loh avangin India an chak a, Asian Cup qualifier-a an mualpho lutuk tur an hliahkhuh.

Kochi khawpuia inkhelah hian fans 22,690 zet an pungkhawm a, banner lian tak tak nen fan-ten India an thlawpna an pholang a, Hong Kong tan chuan zamna tham a tling der tawh.

India-in fan-te lawmna thlen turin an nghah rei a ngai lo. Abhishek Singh-a'n chak zeta ball a tlan luhpui hnuin, Manvir Singh a pe a, Bagan winger hian Ryan Williams tan siamsak lehin, Bengaluru forward hian a tlawh lut.

Kum 32 mi Ryan Williams hi Fulham player hlui niin, Australia tan vawi khat a lo inlan tawh bawk. November 2025 khan Australia khua leh tui a nihna chu hlipin, India mi leh sa nihna a nei a, India tana a inlan hmasak berah goal a khung nghal.

Blue Tigers tana bul ṭantu Lallianzuala Chhangte leh Lalengmawia Ralte (Apuia) te an khel ṭha thlawt a, Mizo player ṭha pahnih hian goal khungna chance nei ve ve mah se, an chhawr lo thung.

Minute 50-naah India tan Akash Mishra chuan ṭha zetin a khung belh a, Mumbai City fullback tan ram tana a goal hmasa ber a ni tel nghal bawk - Hong Kong hian Everton hmangin si phurh sut ṭhen ve mah se, awmzia a nei phak lo a, 2-1 in India an chak.

Hong Kong tana goal khungtu Everton hi Brazilian a ni a, mahse, Hong Kong khua leh tui nihna a neih tel avangin Hong Kong tan a inlan.

India forward Lallianzuala Chhangte chuan, "Pathian zarah hnehna kan chang thei a, a lawmawm khawp mai. Mimal tak chuan, goal hmaah ka duhthusamin ka hriam tawk lo - goal emaw assist emaw neih belh ngei tumin ka inlan a, a hlawhtling ta lo a, ka ui khawp mai," tiin Vanglaini a hrilh.