Tottenham boss thar De Zerbi

Inbiakna an kalpui hnu rei lotêah Tottenham Hotspur chuan, head coach atan Roberto de Zerbi an lakluh thu an puang a, Italian coach hian kum nga chhung cham turin contract a ziak.

Brighton & Hove Albion pawh lo enkawl tawhtu hian, match sarih khelh tur la awmah Spurs hi relegate lo tura chhanchhuah a tum dawn. A relegate pui a nih pawhin Spurs hi a enkawl chhunzawm turin an inrem.

Kum 46 mi De Zerbi hi tun season-a Spurs enkawltu pathumna chiah a ni a, a hmaah Thomas Frank leh Igor Tudor ten an lo enkawl tawh. Spurs hian 2026-a Premier League bikah chak an la nei lo a, De Zerbi tan hna a hautak dawn.

De Zerbi chuan, "He club hi a ropui a, khawvela lian leh hmingthang berte zinga mi a ni. Kei pawhin ka zawm thei hi ka hlim hle a ni. Club hruaitute nena kan inbiakna zawng zawngah, hma hun atana an thil tum chu a chiang hle. Chu chu hlawhtlinna ropui tak tak hmu thei tur khawpa team ṭha din leh, min ṭantute phurna leh thahnemngaihna tichhuak thei tur khawpa khelh dan mawia khelh chhuah a ni.

Chutiang thil chu keipawhin thlentir ka duh avangin he hmunah hian ka awm a, thutiam ang ngeia hlawhtlinna thlen tur hian contract pawh rei tak atan ka ziak a, ka theihtawp ka chhuah dawn a ni. Tun hnaia kan thil tum hmasak ber chu Premier League table-a dinhmun sang zawk luah a ni a, chu chu kumin season tawp thlengin kan thupui ber a ni ang, " a ti.

Igor Tudor thlak turin Spurs lo enkawl tawh Ryan Mason, Harry Redknapp, leh Tim Sherwood bakah Sean Dyche te hming ri mah se club hotuten De Zerbi an la ta zawk a, Premier League-a tawnhriat nei a nih bawk avangin an duh ber.

February thlaa Thomas Frank-a’n a chhuahsan khan Spurs hian De Zerbi lakluh an lo tum tawh a, mahse Marseille chhuahsan hlim a nih avangin lakluh nghal kha hmanhmawhthlak lutukah ngaiin an ṭhulh.

Tottenham sporting director Johan Lange chuan,"De Zerbi hi nipui laia lakluh kan tum zingah a hming a ri ring ber a, tuna kan la nghal thei hi kan vannei hle. Khawvela coach ṭha ber zinga mi a ni a, a tawnhriat te club-in kan chhawr ṭangkai ngei ka beisei," a ti.

Spurs hi Premier League-ah 17-naah an awm mek a, relegation zone aṭangin point khat chiahin an him. De Zerbi hnuaia an match hmasa ber ni turin April 12, Pathianni zanah Sunderland an lenchilh dawn a, ni 18-ah a club hlui Brighton an mikhual ve thung dawn.