McLaren tan Piastri a chhuanawm - Stella

McLaren team principal Andrea Stella chuan an driver, Oscar Piastri chu an team tan a chhuanawm hle a, a chet dan chuan rilru a hnehin, a entawn tlak a tih thu a sawi.

Tun season-ah Piastri-a'n bul a ṭan ṭha tawk lo a, Ausrtralian Grand Prix leh Chinese Grang Prix-ah a tawp thleng tlan thei loin a awm. Mahse Pathiannia neih zawh tak Japanese Grand Prix-ah a insiamṭha a, pahnihna niin Kimi Antonelli chiah a tluk lo. Piastri hian tun season-a podium a thlen vawi khatna a ni.

Stella chuan,"Piastri hian bul a ṭan ṭha lo tih phat rual a ni lo a, mahse a rawn thawh leh rualin amaha ṭha ber a rawn thawhchhuahpuiin ka hria a, F1 a luh hnuah a ṭhat ber ṭum niin ka hria.

Inelna hmasa pahniha a vanduai dan kha mi ṭhenkhat tan chuan hnualna tham a ni, mahse, Piastri hi a danglam a, mi rilru nghet leh ngil tak a ni a, entawn tlak tak a nih bakah team tan a chhuanzawm takzet," a ti.

Nikuma Constructors' Championship lo la tawh, McLaren hian an title humhim turin theihtawp an chhuah a ngai dawn a, a chhan chu Mercedes-in season bul an tan ṭhat em vang a ni. Intlansiak pathum an tlan hnuah Mercedes hian Ferrari lakah point 45-in hma an hruai tawh a, McLaren lakah phei chuan point 89-in hma an hruai fal tawh.

Mercedes driver pahnih George Russell leh Kimi Antonelli te an che ṭha a, Australian GP-ah Russell hi chak nghalin, Chinese GP-ah Antoneilli a chak ve thung a, pahnihna pawh Russell tho a ni. Japanese GP-ah Antonelli bawk a chak a, Russell-a tlahniam thung.

Kum 19 mi Antonelli hian record siamin F1 chanchinah championship hmahruai thei naupang ber a ni a, a team-mate Russell-a aiin point 9-in a sang zawk a ni. Mercedes driver te an chet ṭhat avangin McLaren tan an title humhim turin an hmabak a ko dawn.

Piastri hian an car chakna tihpun bakah an car-a buaina leh siamṭhat ngaite chu an sut kian vat a ngai nia a hriat thu a lo sawi tawh. Australian driver hian nikumah khan a teammate Lando Norris laka Drivers' Title a lo chân ṭep tawh.

Hetihlai hian Middle East-a buaina thleng vangin April thlaa neih tur, Bahrain GP leh Saudi GP te chu ṭhulh a lo ni tawh. Inelna an neih leh hmasak ber tur hi Miami GP a ni a, May 3, Pathianni zana neih tur a ni a, April thla chhungin driver ten hahdamna hun an nei dawn.