Neitu thar hnuaiah Blazers an chak

NBA regular season khelh mekah nimin zing khan Portland Trail Blazers chuan 114-104 in Los Angeles Clippers an hneh a, club neitu thar hnuaia an match khelh hmasa berah hnehna an chang nghal.

Intuit Dome, California-a inkhelah club pahnihte an inhnehtawk a, mahse second quarter leh fourth quarter-ah Clippers an inthlahdah a, quarter pahnihah hian Blazers nen an point a inthlauh avangin a tawpah an tuar.

Blazers tan Jrue Holiday-a'n point 30 neiin a score hnem ber a, Deni Avdija-a'n point 28 score-in rebound vawi 11 a la a, assit pariat nei bawkin triple double a siam teuh hle. Holiday leh Avdija te an che ṭha a, team innghahna an ni. Anni bakah hian Toumani Camara (17) leh Scoot Henderson (15) ten Blazers chak nan an thawh hlawk viau bawk.

Clippers tan Kawhi Leonard-a'n point 23 a score a, Leonard hian a zawnin match 52 chhung point 20 a score tling tawh. Leonard bakah hian Darius Garland (20), Brook Lopez (18) leh John Collins (17) te khel chhe lo mah se an vanduai zan an tawng a, Blazer hneh nan a tawk lo a, point 10-in an chak lo.

Portland hian neitu thar an nei a, NHL team Carolina Hurricanes neitu, Tom Dundon-a'n a lei fel tawh. Trail Blazers hi kum 2018-a boral ta, billionaire Paul Allen-a ta a ni ṭhin a, nikum May thla khan Allen-a charity atana sum hmuh zawng zawng hman turin hralh chhuah tur hian chhawpchhuah a lo ni tawh a ni. Sum hman zat tak tarlan ni lo mah se, he inremna hi dollar tluklehdingawn 4.25 vel zeta hlu anga chhut a ni.

Inremnaah chuan he team hi Portland khuaah an la awm reng dawn a, Dundon hi an Governor thar a ni ang. Dundon chuan, "Vawiin hi Portland Trail Blazers hmasawnna tura bul ṭanna a ni a, he team-in hlawhtlinna a lo neih tawh hi kan chhunzawm zel dawn. Min ṭantute tan season tina sang ber thleng thei tur team din turin kan ṭang reng dawn," a ti.

Trail Blazers hian 1977 khan NBA championship an lo la tawh a, mahse tun season erawh an tan a harsa hle thung. An head coach Chauncey Billups chu FBI-in dan loa infiamna thila pawisa khelhna leh, mafia nena inzawmna nei anga an puh avangin hna aṭanga chawlhtir a ni a, interim coach Tiago Splitter-a hnuaiah April 14-a ṭan tur play-in tournament khel turin an inbuatsaih mek.