Kum 24 hnua World Cup khel tur Turkey

Thawhlehni zan World Cup qualifying-ah Turkey chuan 1-0 in Kosovo an hneh a, World Cup khel tura inpetkaiin, kum 2002 hnua an inlan lehna hmasa ber tur a ni. Australia, Paraguay leh USA te nen Group C-ah an awm ho dawn.

Pristina City Stadium, Kosovo-a inkhelah mikhual team an chungnung zawk a, goal chance nei hmasa zawkin, minute 10-na lekah Juventus midfielder Kenan Yildiz-a'n a chance neih chu goal zawnah a pet thei lo.

Mualneitu pawh chance nei lo an ni lo a, minute 29-naah Fisnik Asllani-a shot chu Turkey keeper Ugurcan Cakir-a'n a khawih pial hnuah goal bar a per a, a let leh lam chu captain Vedat Muriqi-a'n hnai tak aṭangin a pet over. First half-ah goal a lut lo.

Second half-ah pawh Turkey bawkin inkhel an thunun a, goal an khung nghal. Minute 53-naah Yildiz-a cross chu Orkun Kokcu-a'n pet ṭha tawk lo mah se, Kerem Akturkoglu-a'n hnai tak aṭangin a lo khawih hman a, Turkey-in goal an khung.

Kosovo-in an si phurh sut tumin an nawr a, Asslani, Elvis Rexhbecaj leh Lumbardh Dellova ten chance nei mah se an vanneih zan a ni lo a, an pet goal thei lo. Hun tawp thlenga goal a luh tawh loh avangin Turkey an chak a, World Cup khel turin an tling.

Turkey hian 2022 khan World Cup khel turin beiseina sang tak an nei hman a, game hnih chiah chak mamawh mah se 3-1 in playoff-ah an hneh lo. Kum 24 zet hnuah football inelna ngaihhlut ber an khel leh thei dawn a, Real Madrid midfielder Arda Guler leh Inter Milan midfielder Hakan Calhanoglu bakah, player langsar dang an tam a, World Cup-ah tikimtu ringawt nih an tum dawn lo.