Liverpool leh Bayern-in Lacroix inchuh dawn

Crystal Palace defender Maxence Lacroix duhtu zingah Liverpool an lang ve leh a, Lacroix duhtu langsar Bayern Munich tan thu hriat nuam a ni lo ang. Reds hian Lacroix hi German champion nen an inchuh a ngai mai thei.

Kum 25 mi Lacroix hian 2024 August khan Wolfsburg aṭangin Crystal Palace hi a zawm a, pound maktaduai 18 man a ni. Palace-ah Lacroix-a'n hma a sawn a, Oliver Glasner-a hnuaiah player pawimawh niin, kum 2025-a FA Cup an champion ṭum khan a inlan kim vek a, tun season Premier League-ah bul a la ṭan kim vek bawk.

Club tan Lacroix a chet ṭhat avangin France-in an ko a, March 26, Ningani zana Brazil nen friendly match an khelh ṭum khan a vawi khat nan a inlan a, Pathianni zana Colombia an hneh ṭum khan bul a ṭan bawk.

Tlarhnung thuam chak tum Liverpool-in Lacroix an hmu tai a, Micky van de Ven, Alessandro Bastoni leh Murillo te ngaihven tho mah se French defender hi a chet ṭhat bakah, a man a tlawm zawk an beisei avangin an duh a, Virgil van Dijk thlak thei turin an ngai.

Hetihlai hian German club lian Bayern-in Lacroix hi an ngaihven ve reng a, Bayern centre back pahnih Hiroki Ito leh Kim Min-jae te dinhmun a chiang lo a, Dayot Upamecano kawppui nghet tur melhin Lacroix hian an mit a la ber. Lacroix hian Bundesliga a lo khelh tawh bawk avangin harsatna a tawh dawn loh bakah, Season tin deuthawa nomawi chawina a nih avangin Bavarians hnar a harsat a rinawm.

Tun season-ah Reds an che ṭha lo a, season thara Champions League khel thei lo dinhmunah an ding. German champion Bayern-in Lacroix an ngaihven ve bawk a, chuvangin Premier League champion lai Liverpool hian player ṭha hip an duh a nih chuan an result a ṭhat a ngai dawn.