Barcelona sawmna hnawl a har ang - Cucurella

Chelsea defender Marc Cucurella chuan a club hlui Barcelona aṭanga sawmna a hmuh chuan hnawl a har tur thu a sawi. Cucurella telna Spain hian Thawhlehni zan khan Egypt nen friendly match an khel a, goal awm loin an inhnehtawk.

Kum 27 mi Cucurella chuan, "Ka tan chuan Spain chu Spain a la ni reng a, ka sei lenna hmun a ni a, let leh tumna hi ka la nei reng. Chutihrualin Spain chhuahsana hmun danga tawnhriat neih hi ṭha ka ti a, tuna ka khelhnaah hian nuam ka ti bawk," tiin a sawi.

Barcelona chungchang zawhna chhangin Cucurella chuan, "Barcelona aṭanga sawmna ka dawng a nih chuan ka tan chuan hnawl a har ang. Keima thutlukna tur chauh a ni lo a, kan chhungkuaa thutlukna siamna tur a ni. Tunah rih chuan chhuah tumna ka nei lo a, sawmna ka dawng a nih erawh chuan uluk takin ka ngaihtuah thung ang," a ti.

Cucurella hi Espanyol academy aṭanga inzir chhuak a ni a, hemi hnu hian Barcelona youth team-ah khelin Catalan club senior team-ah kum 2017 khan match khat a khel hman. Hemi hnu hian Eibar leh Getafe-ah a khel a, kum 2021-ah Brighton tan khelin, a chet ṭhat avangin Chelsea-in pound maktaduai 60-in an lalut.