Arsenal treble champion kawngah Saints

Arsenal-in League Cup final-a Manchester City an hneh loh avangin quadruple champion beiseina a tawp a, Mikel Arteta hote tan treble champion thei an la ni thung. Gunners hian vawiin tlai dar 5:15 hian FA Cup quarterfinal-ah Southampton an hmachhawn dawn a, Arteta hote tan chak ngei a ṭul dawn.

International break-a Arsenal lansarhna ber chu player an inhnukdawk hnem a, hliam an tam tihna a ni. League Cup final-ah Arteta-a'n player a siksawi nasat avangin sawisel a hlawh a, FA Cup-ah erawh hliam vangin loh theih lohin player siksawi a ṭul ang.

London club hian FA Cup zawhah Champions League quarterfinal an khel leh dawn a, Sporting Lisbon nen April 15, Nilaini zan dar 12:30 hian Emirates Stadium-ah an inkhel lehnghal dawn. Chutihrualin Arsenal tan Premier League a pawimawh berah a ngaih theih a, April 11, Inrinniah Bournemouth nen an inkhel ang.

Gunners tana chanchin lawmawm erawh Viktor Gyökeres a che ṭha a, kum 27 mi striker hian an ram Sweden chu World Cup khel turin a tlinpui. Inkhel boruak sangah Sweden-in Ukraine leh Poland te an hneh a, Gyokeres hian goal pawimawh khung ve vein inrintawkna a ngah dawn.

Arsenal khingpui tur Southampton hi Championship club ni mah se zuam ngawt erawh a rem lo ang. Saints hian match 14 chhung chak loh an nei tawh lo a, Tonda Eckert hote hi an muala inkhel tur an nih bawk avangin Gunners lakah thilmak an beisei ngam ang.

Spanish manager Mikel Arteta chuan, "International break zawhah chuan match zawng zawng final ang mai a ni dawn a, match zawng zawng hi thih leh dam inkar a ni tawh dawn," tiin an khelh hmabak pawimawh dan thiam takin a sawifiah a, zanin aṭangin Arsenal fiahna a inṭan chho ang.