Khelo India Tribal Games 2026: Medal 12 hawntu Mizoram

Ministry of Youth Affairs & Sports hmalaknaa neih Khelo India Tribal Games 2026 chu nimin khan a hmawr bawkna neih a ni a, Mizoram chuan medal 12 ngawt a hlawh chhuak.

He thu buatsaih a nih lai hian inelna hi neih a la ni a, hetihlai hian Mizoram chu a pumpuiah pasarihna an la ni - Mizoram hian a telna bik inelna chu a khel zo tawh a, nimin lama infiammi ṭhenkhat results a zirin Mizoram dinhmun hi a danglam leh thei ang.

Chhattisgarh-a neih inelnaah Mizoram hian gold medal pali an la a, Mizoramin gold a lakna hi weightlifting-ah vek a ni - inelna hrang hrangah silver medal panga leh bronze medal pathum an hlawh chhuak.

Raipur, Jagdalpur leh Surguja-ah te KITG 2026 hi neih niin, March 25 khan inelna neih ṭan a ni - he games hi tribal ho khelh tam infiamna puala neih niin, archery, athletics, football, hockey, swimming, weightlifting leh wrestling-ah te an inel.

Mizoram hian football, hockey, weightlifting, wrestling leh athletics-ah te infiammi tirin, infiammi 69 ngawt an feh chhuak a, weightlifting, wrestling leh hockey-ah te Mizoram hian medal a la.

Weightlifting bikah hian Mizoram hian gold pali hlawh chhuakin, silver pathum leh bronze pakhat a la tel. Wrestling-ah medal pathum hlawh chhuakin, silver pakhat leh bronze pahnih an la bawk.

Mizoramin hmeichhe hockey-ah gold lak beisei viau mah se, gold an hlawh chhuak zo lo a, final-ah Odisha chu 1-0 a ngam loin, silver medal-ah lungawi an zir a ṭul ta a ni.