Hockey-ah Mizoramin silver medal la

Khelo India Tribal Games 2026 hmeichhe hockey final-ah Mizoramin gold medal lak beisei mah se, Nilaini zana inkhelah Mizoram team hi a vanduai zawk an ni a, Odisha chu 1-0 in an ngam lo.

Mizoram hian qualifying round-a an lo ngam tawh Odisha zuam mah se, goal hmaah an vannei tawk lo a, goal an chhuah hnuah pawh theihtawp chhuahin nawr mah se, a vanduai zawkah an ṭang a, silver-a lungawi an zir a ṭul.

Lalroṭhuami leh Lalzawnchhungi kaihhruai Mizoram team hian Khelo India Tribal Games hockey-a tel phak tur hian qualifier an khel a, inelna khel tura invaw kai team pariat zingah an tel.

KGIT-ah hian team pali ve vein, group pahnihah ṭhen hran leh an ni a, league round anga an khelh kual hnuah group pahniha a sang pahnihin semifinal an lut - group stage-ah hian tlawm nei loin, Bihar, Madhya Pradesh leh Chhattisgarh te an hneh vek!

Semifinal-ah hian qualifying round final-a an ngam loh tawh Jharkhand hmachhawn zuiin, 3-2 in an hneh a, final an lut. Mahse, final-ah qualifying round-a an hneh hnu Odisha an ngam lo ve leh ta thung a, silver zawk an rawn hawn ta a ni.