Enzo chungah Chelsea player an lawm lo!

Premier League club talbuai mek Chelsea-in chanchin lawmawm lo an nei zel a, player ṭhenkhat chu Reece James awm loh laia captain armband hrengtu Enzo Fernandez chungah an lawm lo niin khawthlang media-te chuan an tarlang.

Tun hnaiah Enzo hian Chelsea chhuahsan tum awm ang takin thawm a nei fo a, Champions League aṭanga Paris Saint-Germain-in an petchhuah hnu lawkah khan Blues chhuahsan thei dinhmuna a din thu a sawi.

Argentine midfielder hian, "Ka hma hun ka sawi thei lo. Tunah hian league match riat leh FA Cup khelh tur kan la nei a, chumi zawhah World Cup a la awm bawk. Chungte chu han khel phawt ila, a chiang ang chu," a ti.

Chelsea boss Liam Rosenior chuan hemi hnu hian Enzo nen an inbiak thu leh, a ṭawng chu English media ṭhenkhatin a ni lo zawng deuha an lehlin thu a sawi a, mahse, a hnua a mizia zelin Chelsea chhuahsan a hreh lo tih erawh a tilang.

Enzo hian tun hnai khan amah duhtu Real Madrid nena ngaih bel theih tak turin ṭawngkam a nei leh a, "Madrid hi ka khaw nuam tih tak a ni a, Buenos Aires (Argentina khawpui) min hriatchhuah tir ṭhin a ni," a ti!

Kum 25 mi Enzo hian January 2023 khan Chelsea hi Benfica aṭangin a zawm a, kum 2032 thleng contract a la nei. Enzo hian a player duh ber chu Real Madrid legend Toni Kroos a nih thu a sawi bawk a, club buai boruak kara a ṭawngkam leh chet danin a player puite bakah fans lung a tiawi tawh lo.

Chelsea player hlui John Obi Mikel chuan, "Chelsea hi club dang zawmna tur hmanrua a ni lo," tiin Enzo hi na takin a sawisel a, PSG an hneh loh ṭuma khelmuala a khelhpui ṭhenkhat nen an inhnial danah Chelsea player lungawi lo an awm nual niin an sawi bawk.

Khelmuala langsar taka a au khum player-te hi Enzo chungah an lawm lo a, tun hnaia Chelsea result nen Blue fans tan chuan hriat a nuam lo hle ang - zanin dar 9:45-ah FA Cup quarterfinal khel turin Port Vale an mikhual zui dawn.

Chelsea hi EPL table-ah parukna an ni mek a, Champions League khel phak china awm, pangana Liverpool chu point khatin an phak lo mek. Match sarih chiah khelh tur an nei tawh a, an hmabak zingah Manchester City, Manchester United, Liverpool leh Tottenham Hotspur an la awm.