Lakers chak loh zanah Doncic inhliam

NBA regular season khelh mekah nimin zing khan Los Angeles Lakers chuan 139-96 in Oklahoma City Thunder an hneh lo a, Lakers hi an chak loh bakah an innghahna Luka Doncic a inhliam avangin an tan zan duhawm a ni lo.

Paycom Center, Oklahoma-a inkhelah Lakers an che hleithei lo a, match hnuhnung pangaa point 40 nei tling vek, Doncic pawhin point 12 chauh a nei hman. Doncic hian third quarter tir lamah ball khalh pheiin, amah vengtu nen intibuai lo mah se a malpuiah hliam a tuar a, chhuatah a bawk nghal a, a chawlh rei a rinawm.

Doncic tel loin Lakers an ṭha tawk lo a, LeBron James (13) leh a fapa Bronny James (10) bakah Austin Reaves (15) khel chhe lo mah se an vanduai ṭum an tawng a, point 43 zetin an chak lo.

Hetihlai hian dan pangngaiin Thunder an khel ṭha a, MVP ni lai Shai Gilgeous-Alexander (28) leh Isiah Joe (20) te an khel ṭha takzet a, Western Conference hmahruaitu leh playoff khel tura tling hmasa ber an nih chhan an tilang chiang hle.

Inkhel tawpa mipui sawi zui hlawh ber erawh Doncic a ni a, Western Conference Player of the Month-a thlan hlim Doncic hi MRI test a hmabak a, test zawh hnuah a dinhmun a hriat chauh dawn niin coach JJ Redick-a'n a sawi.

JJ Redick chuan,"Player-te hi dinhmun hlauhawmah kan dah dawn lo. Hetiang thil hi chu inkhelin a ken tel a ni a, thleng ve tur reng a ni. Chawlh lawk lai khan kan sawi ho tawh a, Minute ruk vel hun pek kan tum a, hma kan hruai theih loh chuan lak chhuah kan tum. Mahse lakchhuah kan tum dawn hnaiah tak a inhliam a, pawi kan ti takzet," tiin a sawi.

Slovenian point guard hi tun season-ah a che ṭha a, MVP ni thei tur zingah a hming a langsar hle. Doncic hian match 64 khel tawhin MVP ni thei tura khelh ngai, 65 chu match khat chiahin a phak lo. Lakers-in match nga khelh an la hmabak a, Doncic hian a inhliam vanga a khel chhunzawm thei dawn lo a nih chuan MVP a ni thei dawn lo.