Champion beisei Barca hmaah Atletico

La Liga hmahruaitu Barcelona chuan International break neih hnua an match hmasa ber an khel dawn a, zanin dar 12:30-ah Atletico Madrid an mikhual dawn. Barca hian Atletico hi Copa del Rey-ah an lo hneh tawh loh avangin tlawm nawn an tum tawh dawn lo a, zaninah inkhel hmuhnawm a awm dawn.

Tun season-ah Atletico leh Barca hi an in tum zing hle a, La Liga-ah vawi khat an intum tawhin 3-1 in Barca-an chak a, Copa del Rey-ah Atletico hian phuba lain Catalan club hi an pet chhuak, tun season-a a vawi li nan zaninah an inhmachhawn leh dawn. Zanina an inkhelh zawhah hian team pahnihte hi Champions League quarterfinal-ah an la inhmachhawn dawn bawk a, tun season-ah vawi ruk zet an intawng dawn.

Atletico hi tun season-ah beisei an pha lo a, an tan La Liga champion beisei chi a nih tawh lo a, palinaah awmin Villarreal nen an dinhmun an inthlak reng. Diego Simeone naute hian champion beisei tawh lo mah se a sang thei ang bera awm an duh dawn tho a, Copa del Rey aṭanga an pet chhuah Barca an hlau dawn lo.

Madrid club tan tlarhmaah Julian Alvarez leh Alexander Sorloth te chu an innghahna an ni leh dawn a, anmahni thlawp turin Antoine Griezmann a awm dawn bawk. French forward Griezmann hian season tawpah a chhuah tur thu a tichiang tawh a, a la cham chhungin Atletico tan a theihtawp a chhuah dawn a, zaninah pawh a inlan a rinawm.

Hetihlai hian Barca an dam kim lo a, tlarhma lamah Raphinha chu international break-ah a kaihza tha a tihnat avangin a khel thei dawn lo. Brazilian forward bakah hian Andres Christensen leh Frankie De Jong te chu khel lo tur chiang sa an ni.

Chutihrualin Barca tan rawlthar duhawm, Lamine Yamal leh Marcus Rashford te an awm thei dawn a, veteran striker Robert Lewandowski leh Ferran Torres te an awm dawn bawk avangin Hansi Flick-a naute hi chak turin an ṭha tawk.

Barca hi an hmelma Real Madrid nen point liin an inthlau mek a, zaninah pawh Real result hre chungin an khel dawn a, Real an chak a nih chuan Flick-a naute tan pressure a awm thei ang.