Liverpool keeper hlui Mignolet a chawl dawn

Liverpool leh Belgium keeper hlui Simon Mignolet chuan, season tawpah football chawlhsan a tum thu a puang a, May 24-a KAA Gent an mikhualm hun chu a inkhelh tawpna ber tur a nih thu a sawi.

Kum 38 mi Mignolet hian 2004 khan Belgian Second Division club Sint-Truiden-ah a career a ṭan a, 2010-ah Premier League club Sunderland-in pound maktaduai hnihin an la lut. Sunderland tan kum thum khelin match 101 a inlan hman a, khawvelin Mignolet kan hriat ṭanna a ni.

Kum 2013 nipui lai khan pound maktaduai kuain Liverpool a zawm leh a, 2019 thleng a cham. Liverpool-ah kum ruk a awm chhungin match inelna hrang hrangah match 204-ah a inlansak hman a, 2019-a Champions League-a champion team-ah khan a tel hman. Belgian keeper hian hemi hnu lawk hian an ram club Club Brugge zawmin tun thlengin a khel a ni.

Mignolet chuan, “Thil tawp dan hi ka thu a ni vek lo, mahse ka thawhrimna leh ka tumruhna erawh a tawp thlengin Club Brugge-a ka awm chhung chuan ka lantir zel dawn a ni. Ka hmaah khelh hmabak game 10 pawimawh tak kan la nei a, champion nena hun tawp khar ka tum dawn a ni,” a ti.

Belgian keeper hi ram tan vawi 35 a khel hman a, World Cup vawi thumah squad-ah awmin, Euro vawi hnihah Belgium squad-ah a awm bawk. Kum 2023 khan ram tan inkhelh a chawlhsan tawh bawk. Thibaut Courtois a awm avangin Mignolet hi ram tan a inlan tam tawk lo.