Kane-a'n hliam nen team a zawm

English forward Harry Kane chuan international break hnuah, hliam nei chungin club-ah a kir. Zanin dar 7:00 hian Bayern Munich-in Freiburg an lenchilh dawn a, Kane-a dinhmun avangin coach Vincent Kompany a lawm lo hle.

Kane hi England practice-naah a ke rek a tina a, minute 15 bak training-ah a inlan thei lo niin Three Lions coach Thomas Tuchel-a'n a sawi.

Bayern coach Kompany chuan, "A lawmawm loh khawp mai. Awm ve ngei se ka ti viau a, mahse tun dinhmunah chuan chu chu a chiang rih loh a ni. Pathianni liam ta thleng kha chuan Kane chu England squad-ah ṭha takin a inbuatsaih a, mahse a ke rekah hliam a tuar. Midang erawh Freiburg hmachhawn turin inpeih thawkhat," a ti.

Kum 32 mi Kane hi tun season-a khel ṭha a, inelna hrang hrangah match 40 khel tawhin goal 48 a khung tawh. Bundesliga bikah match 26 khelin goal 31 a khung tawh a, match sarih khelh tur la awmah season khata Bayern tana goal thun tam ber, Robert Lewandowski (41) chu khum a tum dawn a ni.