FA Cup aṭangin Arsenal an tla

Arsenal-in March thla laihawlah quadruple champion an inbeisei a, April thla a inherchhuah meuh chuan treble champion pawh an beisei ngam tawh lo. Mikel Arteta kaihhruai Arsenal-in Inrinni zan khan FA Cup-ah Southampton 2-1 a hneh loin an tla a, Saints hi Championship club an ni.

St Mary's Stadium-ah Ross Stewart hmangin Southampton-in goal an khung hmasa zawk a, Gunners-in substitute Viktor Gyokeres hmanga an sut hnuah chak mai tura ngaih ni mah se mualneitu lamin Shea Charles goal hmangin hnehna an chang ta zawk.

Arsenal tan Premier League leh Champions League la champion theih mah se match hnuhnung pahnih an khelh dan aṭanga teh chuan arte lu kawn theih an ni a, Gunners ṭantute awm a nuam tawh lo ang.

Kepa ringtu Arteta

Arsenal-in international break hmain League Cup final-ah Manchester City an hmachhawn a, Mikel Arteta hian goalkeeper rinrawl David Raya aiah Kepa Arrizabalaga a thlang. Kepa tihsual vangin Arsenal an chak lo a, inkhelh banah Arteta-a'n a thutluknaa inchhirna a neih loh thu a sawi bakah thlan nawn theih pawh ni se, thutlukna ngai bawk a siam tur thu a sawi.

FA Cup khelh hmain Arteta-a'n goalkeeper chungchangah zawhna a dawng a, Spanish manager chuan, "Spanish keeper an lut ang a, a hming tawpah 'a' a awm a, kum 32 aia naupang a ni a, ṭawng chi hnih a thiam bakah a ke dinglamin a pet," tiin a sawi a, Raya emaw Kepa emaw an ni thei ve ve.

Inkhelh hun a thleng a, Arteta-a'n City laka chesual Kepa bul ṭan nawn tir. Spanish manager hian a keeper neih ṭhat ber a luhtir lo a, hliam vangin buai deuh mah se a chhawr theih chinah pawh a neih ṭhat ber a luhtir lo.

Striker chhuanvawr Viktor Gyokeres bakah defender pawimawh William Saliba te an lut lo a, Martin Zubimendi pawh bench-ah a awm. Player ṭha dang Declan Rice, Eberechi Eze, Bukayo Saka leh Mikel Merino te hliam vangin a chhawr thei lo hrim hrim.

Chutihrualin bul ṭantu zingah captain Martin Odegaard, Kai Havertz, Ben White leh Gabriel Magalhaes te an awm a, Championship club laka chak turin Arsenal an la ṭha tawk.

Mahse maw!

Arsenal-in ball an chang tam a, mah se Saints lakah goal hlauhawm an nei thei lo. Goal hmaah mualneitu an hriam zawk a, minute 35-naah Ross Stewart hmangin hma an hruai. Gunners defender Ben White-a'n ball kal dan a chhut sual a, Stewart-a finishing a ṭha ve bawk.

First half-ah Arsenal-in siphurh an sut hman lo a, second half ṭantirhah goal a luh loh bawk avangin minute 61-naah Noni Madueke, Viktor Gyokeres leh Riccardo Calafiori te a rualin an rawn lut. International break-a che ṭha Gyokeres-a'n minute 69-naah Kai Havertz-a ball pek ṭha chu goal-ah a chantir a, 1-1 ni chiah mah se Gunners buk a rit leh ta hle.

Mahse maw, Arteta ang thoin Saints manager Tonda Eckert-a'n substitution awmze nei a siam. Minute 77-naah Shea Charles a rawn lut a, Manchester City academy chhuak hian minute 85-naah chakna goal a khung. Charles-a'n goal a khung theih nan Tom Fellows-a'n a khalh lut ṭha a, Arsenal tlarhnung a pherh ve bawk.

Engtin zel?

Hun rei lote chhungin Arsenal an tlu sawp a, Wembley Stadium-a Man City an hneh loh zawhah St Mary's Stadium-ah Southampton an hneh loh avangin League Cup leh FA Cup champion beiseina a tawp. Vawi leh khatah Arteta leh a hoten 'pressure' nasa tak an nei a, rang taka an insiamṭha a nih loh chuan Champions League leh Premier League champion pawh a chiang leh ta lo.

Mikel Arteta chuan, "Ṭum danga goal kan chhuah zen zen loh angin goal kan chhuah a, goal venhim kawngah tihsual neih chuan semifinal thlen a harsa ang. Hliam vanga kan harsatna kan chhuanlam thiang lo a, hun harsa hi kan paltlang a ngai. Tunah chuan kan nihna kan pholang a hun ta," tiin champion zia an lantir a ṭul thu a sawi.

Arsenal hian April 7, Thawhlehni zan hian Lisbon-ah Sporting nen Champions League quarterfinal first leg an khel dawn. Hemi zawh hian Bournemouth, Sporting (UCL quarterfinal second leg) leh Manchester City an hmachhawn zui dawn. Pep Guardiola kaihhruai City hi UCL aṭanga an tlak tawh avangin Arsenal elpui turin Premier League-ah an insawrbing thei tawh thung.