Chelsea-in goal an surtir

Tun hnaia team boruak ṭha lo tak Chelsea-in FA Cup semifinal an lut a, a thiam pali zinga inhlangkai tur hian Port Vale chu 7-0 ngawtin an sawp.

Chelsea hian tun hnaiah beisei angin result an nei thei lo a, an match hnuhnung paliah an tlawm vek. Premier League-ah Newcastle United (1-0) leh Everton (3-0) an ngam lo a, season thara Champions League khel lo thei dinhmunah an ding mek - pangana Liverpool chu point khatin an phak lo mek.

UCL-ah lah round of 16 aṭanga petchhuah an ni a, Paris St-Germain chu first leg-ah 5-2 a ngam loin, second leg-ah 3-0 in an tlawm zui a, midfielder pawimawh Enzo Fernandez chuan club lama a hma hun a chian loh thu a sawi zui.

Argentine midfielder hian a duhtawk mai lo. International break lai khan Real Madrid nena sawi zawm theih tak turin, Madrid khawpui a ngainat thu a sawi bawk.

Chelsea hian an vice captain hi an hrem zui a, match hnih chhung club tana inlan rih lo turin an ti. Port Vale nena an inkhelah pawh Enzo a inlan thei lo a, kartawp EPL match-a Manchester City an hmachhawn hunah pawh a inlan thei dawn lo.

Mahse, Enzo tel lo pawhin League One club lakah chuan Chelsea an hriam a, goal pawh an khung hma - thil danglam ve tak chu, goal sarih khungtute hi player hrang vek an ni.

Second 64-naah Jorrel Hato chuan goal hmahruai khung nghalin, Joao Pedro-a'n minute 25-naah a belhchhah a, Cole Palmer-a'n goal khung lo mah se, minute 43-naa Port Vale defender Jordan Lawrence-Gabriel-a'n an lama a tihluh chu Palmer-a shot aṭanga lut a ni.

Blues hian chawlhlawk an hman meuh chuan 3-0 in hma an hruai tawh a, Stamford Bridge-ah chak tur a chiang hma, tiin a sawi theih. London club hian insum erawh an tum lo.

Tosin Adarabioyo, Andrey Santos leh Estevao Willian ten khung belh lehin, 6-0 a ni a, hun pek belhah penalty an la hmuh belh cheu zui - Garnacho chuan penalty hi petin, goal-ah a chantir a, chiang takin Chelsea an chak.

Match li a zawna an chak loh hnuah Chelsea an chak a, mahse, an result aiin Enzo-a'n sawi a hlawh zawk. Argentine midfielder an hrem hlim khan coach Liam Rosenior chuan a player hi demin, "Chelsea-a a hma hun a chian loh thu a sawi mai khan min tilawm lo hle a ni.

"Enzo sawichhiat ka tum lo a, mahse, kan team kalphung erawh a bawhchhia a ni. Hlawhtlin duh mi player a ni a, ka zah em em. Mahse, Enzo hrem tura thutlukna hi keimah leh sporting director te chiahin kan siam a ni lo.

"Club neitu leh player te nen pawh kan inthurual vek. A tan kawng kan khar hran lo a, kan hrem rih mai chauh a ni. Club kal dan hi kan hum tlat a ngai a, Enzo erawhin a bawhchhia a ni," a ti.

Hetihlai hian Enzo agent Javier Pastore chuan a player chuan Chelsea thutlukna a hriatthiam loh thu a sawi a, Port Vale an sawp hnuah hemi chungchang hi Rosenior hi an zawt.

Rosenior chuan, "A ngaihdan a sawi a ni mai a, mi ngaihdanah thu ka nei lo. Ka player-te nena kan inkawmna leh inbiakna chu puanzar phen lam thil a ni a, heti laia sawi a rem lo," a ti - Chelsea an ngaihnawm zel dawn!