Naupang League champion AGC 'A'

RFYC Naupang League Season 4 Aizawl bik chu inelna ṭan anga ni 224 hnuah khelh zawh a ni a, Aizawl Grassroots Centre A chu overall champion an ni a, Little Kickers Football Academy-in fairplay chawimawina an dawng thung. Inelnaah hian team 16 an tel a, category pali Under 8, Under 10, Under 12 leh Under 14-ah inelna hi neih a ni.

Team 16-te chu B12 Football Academy (College Veng), Beck’s FA (Tanhril), Durtlang Grassroot Centre, FC Dawrpui Vengthar, GIG FA (Chaltlang), Goals FA (Zotlang), Green Field FA (Tuithiang), Kanan FC, Little Kicker’s FA (Mission Veng), Living Water School & Bomber Academy (Mission VT), Lushai Corner FA (Luangmual), MFA AGC ‘A’, MFA AGC ‘B’, MSSC FA (Ramhlun), Neuhof School (Chanmari) leh Republic GSA te an ni.

Vawiin aṭangin RG Stadium-ah Inter District Championship neih a ni dawn. Naupang League hi Aizawl bakah Champhai, Lunglei leh Kolasib-ah te neih a ni a, Inter Dist C'ship-ah hian naupang ṭha rual an fuan khawm ang.

Reliance Foundation Young Champs leh MFA ten Naupang League season li chhung an buatsaih ta a, Mizoram football-ah Naupang League rah chhuah a lang ṭan. He inelna hlawhtlin theih nana mi pawimawh technical head Lalrindika, mentor S. Malsawmtluanga, location manager VL Rinpuia, cordinator Lalzarmawia leh Lalrinsanga bakah club tina team enkawltute leh nu leh pa te an fakawm hle.