Bayern-in inlehthalna ropui lantir

Inrinni zan Bundesliga inkhelah hmahruaitu Bayern Munich chuan khualmualah Freiburg an hneh a, goal hnih chhuah hmasa mah se hun tawp dawnah goal thum khungin an lehthal.

Freiburg tan Johan Manzambi leh Lucas Holer ten goal khat ve ve an khung a, Bayern tan Tom Bischof-a'n goal hnih khungin Lennart Karl-a'n goal khat a thawh ve bawk.

Europa-Park-Stadion, Freiburg-a inkhelah dan pangngaiin Bayern-in ball an chang tam zawk a, chance insiam an harsat thung. Ball an chan chhunah Freiburg an hlauhawm zel.

First half-ah Freiburg tan Philipp Treu, Holer leh Philipp Lienhart ten an chance neih an hlah vek a, an vannei tawk lo. Bayern keeper Manuela Neuer a khel ṭha ve bawk.

Second half-ah Freiburg an vanduai reng lo a, ṭan aṭanga minute khat pawh a liam hmain Manzambi-a'n kawh zetin goal kilah a pet lut a, a team hma a hruaipui.

Freiburg an phur chhunzawm a, minute 71-naah corner aṭanga ball kal chu Neuer-a'n hmun himah a nam chhuak zo lo a, Holer-a ke bulah tak tlain, hnai tak aṭangin a khung. German forward hi a vanneih zan ni se goal tam zawk khung thei tur a ni.

Goal hnih an chhuah hnuah Bayern an insiamṭha a, chance nei mah se Harry Kane-a tel loin an tlarhma a hriam tawk lo. Kane awm lo mahse Bischof an nei a, German rawlthar hian minute 81-naah leh, hun pek belh minute hnihnaah box pawn aṭangin goal a khung a, an si phurh a sut zo.

Bavarians-in an la duhtawk mai lo a, hun tawp hma hretin Alphonso Davies-a cross chu Karl-a'n harsatna nei loin a khung. Hun a tawp zui nghal avangin Bayern an chak a, hnehna an chan theih nan German rawlthar pahnih Bischof leh Karl an ṭangkai takzet.

Vincent Kompany naute hian point kuain hma an hruai mek a, Bundesliga match ruk khelh tur la awmah an chesual viau a nih loh chuan an champion a rinawm tawh.