Ronaldo a dam leh ta

Thla khat zen zawn hliam vanga a chawlh hnuah Cristiano Ronaldo a lo kir leh ta a, goal hnih a khung nghal - Al Nassr chu Saudi Pro League inkhelah 5-2 in a chakpui a, Zirtawpni zan khan table mawngphah luahtu Al Najma an sawp.

Kum 41 mi Ronaldo hian February thla tawp lam khan a malpuiah hliam a nei a, a hliam hi rin aia a lo nat avangin thla hmasa khan Spain-ah inenkawl turin a kal - hetih chhung hian league match hnih a khel lo a, international break-a Portugal match hnihah a inlan thei lo bawk.

Mahse, a lo kir lehna hmasa berah goal a khung nghal a, a dam chiang e! Al Najma hian rin loh takin Rakan Al Tulayhi hmangin goal hmahruai an khung a, mahse, Al Nassr-in Abdullah Al Hamddan leh Sadio Mane hmangin an chhanglet.

Al Najma hian Felippe Cardoso hmangin si phurh sut leh mah se, Ronaldo-a'n goal hnih a rawn khung zui a, goal khat hi penalty aṭanga a chhuih luh a ni - hun pek belhah Mane-a'n goal khat dang khung leh bawkin, 5-2 in an chak.

Al Nassr hian league table chung ber an luah chhunzawm a, pahnihna Al Hilal nen match 27 ve ve khel tawhin, point ngain an sang zawk.