Bengaluru-in Goa an hneh

Inrinni zan Indian Super League inkhelah Bengaluru an chak a, an mikhualna ramah FC Goa chu 2-0 in an hneh - Bangalore club hian coach thar Pep Munoz nei mah se, Spanish coach hi a visa a la fel theih loh avangin Renedy Singh-a'n Bengaluru a la enkawl a, a chakpui.

Bengaluru tan Sunil Chhetri leh Namgyal Bhutia ten goal khat ve ve an khung a, Bhutia goal khung hi bench aṭanga luhtir Lalremtluanga Fanai siamsak a ni. Goa tan Ayush Chhetri chu hliam vangin squad-ah a awm lo a, Daniel Lalhlimpuia chu bench aṭangin a lut.

Hetihlai hian champion tum Mohun Bagan an chak zo lo a, an mikhualna ramah Jamshedpur nen 1-1 in an inhnehtawk. Bagan hian minute 15-naa Liston Colaco-a goal chu an chakpui dawn emaw an ti a, mahse, hun pek belh minute nganaah Jamshedpur tan Ritwik Das chuan si phurh a sut.

Team pahnihin point an insem a, Bagan hi match thum a zawnin an chak zo lo ta. Hetihlai hian Men of Steel pawh match thum tho a zawnin an chak zo lo tawh a, ISL champion tum inum boruak a sang zel.

Jamshedpur tan hian Mark Zothanpuia chuan inkhel bul ṭanin, C. Lalhriatpuia chu bench aṭangin a lut bawk a, Bagan tan Lalengmawia Ralte (Apuia) chuan minute 90 a khel tluan bawk.

Mumbai City, Bagan, Jamshedpur leh Bengaluru ten point 14 ṭheuh an nei ta a, nizana inkhel Mumbai club an chak chuan point thumin hma an hruai fal thei dawn.