PSG-in Champion an hnaih

Ligue 1 hmahruaitu Paris Saint Germain chuan Zirtawpni zan khan 3-1 in Toulouse an hneh a, anmahni hnaih bertu RC Lens an chak loh avangin point liin hma an hruai.

PSG tan an thiampuipa Ousmane Dembele-a'n goal hnih a khung a, French forward Dembele hian a goal pahnih hi first half chhungin a khung ve ve.

Dembele goal khung karah Toulouse tan, Rasmus Nicolaisen-a'n goal khat a khung ve a, mahse hun tawp dawnah PSG tan Goncalo Ramos-a'n an chak nemnghehna goal a khung a, Nicolaisen-a goal khung chu scoreline timawitu chauh a ni.

Tun season-ah hliam vangin Dembele-a'n beisei a pha lo a, mahse a dam ṭhat chuan a thiam ngaiin a la thiam reng tih a lantir a, tun season Ligue 1-ah goal 10 a khung tling tawh.

Luis Enrique naute hian Ligue 1-ah match sarih khelh tur an la nei a, Lens aiin match khatin an khel tlem zawk. Mahse PSG hian chetsual an chin avangin an fimkhur a ngai a, an ban phak maia awm tawh champion nomawi an hloh a nih chuan, an phu lo angah a ngaih theih ang.