MSL tinungtu Zemabawk

Tun season-ah Zemabawk BC-in fans an nei ṭha ber a tih ngam a, Zemabawk fan-te hi MSL 11 tihmuhnawmtu leh tinungtu pakhat an ni. Zaninah pawh Zemabawk mipuiten an veng club hi an ṭawiawm leh ngei a rinawm. Zemabawk ṭantuten an club hi season tir lama an chet fuh loh lai pawhin an phatsan lo a, khuangpui nen Hawla Indoor Stadium lam panin an kal ziah. Fan-te hian inkhel an en satliah lo a, an player te an auh phur bakah an khingpuite an au zam thiam ṭhin.

Zemabawk fan-te hi Zarkawt BCA lakah pawh fan-te thawm a na a, an au thawmah player-te an zam tih a hriat. Free throw an shoot dawnah thawm an nei ring zual a, player tawnhriat nei tlem tan chuan zamna tham a tling a, rilru fim pu thei lo khawpin an tizam ṭhin. Player te mai bakah match referee te thutluknaah an lawm lohin mawi tak siin an lantir a, referee tawnhriat ngah lo tan chuan zamna tham a ni.

Zemabawk mipuite au thawm chu an coach Liansangpuia pawhin an chak chhan a nih thu a lo sawi tawh a, an inter state player Shashank pawhin hetiang boruak hnuaiah hian a la khelh ngai lo thu leh, nuam a tih thu IG-ah a lo sawi tawh bawk.

Fan-te hian final an thlen theih nan an player te tluk zetin an thawh hlawk a, champion an tum a nih chuan Zemabawk ṭantute hian an club hi zanainah an thlawp chhunzawm a pawimawh dawn a, an player te khelh ṭhat nan an thawm an chhuah leh ngai a, Khatla tan theihtawp an chhuah ngei pawh a rinawm.

Hetihlai hian Khatla TBL fan te an duai bik lo a, season hmasaa Zemabawk nen semifinal-a an inauh el dan chu tun thlenga sawi zui la hlawh a ni a, he game-ah hian TBL an chak bawk. TBL ṭantute hi zaninah Zemabawk fan-te an au laia ngawih mai mai an duh dawn bik lo a, zaninah R. Dengṭhuama Indoor Stadium-ah 'TBL' nge 'Zemabawk' tia au thawm ring zawk a hriat dawn.