Hun tawp lamah Aizawl FC an ṭha

Indian Football League-ah Aizawl FC-in Pathianni zan khan Sreenidi Deccan nen 1-1 in an inhnehtawk a, point khat hlu tak an hlawh chhuak. Hyderabad club hian David Castaneda hmangin first half-ah khung hmasa mah se minute 87-naah Aizawl FC-in siphurh an sut a, Sreenidi defender Jagdeep Singh-a'n an lama a tih luh a ni.

Sreenidi an ṭha

ISL khelh tum ngam Sreenidi Deccan-in champion ngei an tum a, Aizawl FC lakah pawh an khel ṭha zawk. Mizo club lakah Sreenidi tan Mizo tlangval pathum Lalromawia, Lalthankhuma (TK-a) leh Brandon VL Remdika ten bul an ṭan a, mualneitu hi an chungnung nghal hle.

Sreenidi hian first half-ah chance ṭhahnem tak an nei a, Aizawl FC goalkeeper Vanlalhriatpuia khelh ṭhat zarah goal erawh an khung lawk lo. Amaherawhchu Mizo club tan chelh reng theih a ni lo a, minute 29-naah Sreenidi tan Brandon-a siamsak chu David Castaneda-a'n a khung.

Hun tawpah AFC

Tun season-ah Aizawl FC-in halftime an hmang ṭha a, second half-ah an khel ṭha ṭhin hle. Rajasthan United 3-1 a an hneh ṭumin second half-ah goal hnih an khung a, Real Kashmir nen 2-2 a an inhnehtawk ṭum pawhin injury time-ah siphurh an sut.

Mizo Derby-ah Chanmari lakah first half-ah goal hnih chhuah mah se second half-ah goal thumin an chhanglet a, Gokulam an hmachhawn ṭum pawhin chak zo lo mah se hun tawp dawn hnaihah goal hnih an khung.

Sreenidi lakah pawh Mizo club-in beisein an nei tlat a, minute 87-naah Lalrempuia freekick pet chu Jagdeep Singh-a'n an lamah a tilut. Aizawl FC-in khualmualah point khat hlu tak an hlawh chhuak a, championship playoff khelh beiseina an nei chhunzawm zel. Sreenidi erawhin pakhatnaa awm theihna hun ṭha an bawhpelh thung.